Ta surgi awor problema entre gobierno di Aruba y e colegio di supervision financiero CAft encuanto e surplus cu a crece cerca e entidadnan cu ta forma parti, hunto cu Pais Aruba, di loke den e acuerdo y leynan concerni yama e ‘sector colectivo’. Mester bisa cu anterior na entrada di e fenomeno di supervision financiero di parti di Reino, gobernacion di Aruba no tabata maneha e concepto aki. E entidadnan cu potencialmente ta forma parti di esaki tabatin nan areglo individual cu Pais Aruba tocante eventual compromiso y fluho di recurso financiero.

E supervision financiero sin embargo desde promer momento no tabata contempla maneho financiero di Pais Aruba so, pero tabata tuma na cuenta henter e sector colectivo, pasobra ta trata di e riesgo financiero cu Pais Aruba ta core, na momento cu un entidad no por logra atende nan asunto financiero debidamente. Ehemplo di esey semper tabatin ‘de sobra’: añanan largo gobierno di Aruba, obliga pa ley, tabata completa financiamento di AZV. Tambe na momento cu SVb Aruba tabata yegando ‘end of the line’ usando tur reserva cu e fondo tabatin, no por a keda sin actua, sino gobierno mes lo mester a carga consecuencia financiero di e eventual incapacidad di SVb pa paga pension na esnan cu pa ley tin derecho riba esey. Tambe te awe gobierno di Aruba ta carga e peso di e deficit financiero cerca Post Aruba, Arubus y Serlimar, y asina tin mas entidad cu ta representa un riesgo potencial continuo pa caha di Pais Aruba.

E impresion tabata cu desde promer momento gobierno di Aruba tabatin problema pa maneha e concepto aki y cumpli cu consecuencia di esaki. Pa cuminza desde inicio tabatin problema pa cierto entidad cu segun acuerdo ta pertenece na e sector colectivo, entrega nan informacion financiero na tempo. Varios di nan, no tur, no tabata ni custumbra di entrega algo internamente, te pa nan tabata obliga pa gobierno pa duna cuenta manera ley ta prescribi. Den tur e añanan cu CAft ta opera esaki a keda un keho constante, y nos no tin ningun comprension pa e falta di accion di banda di gobierno pa obliga tur entidad pa cumpli sagradamente cu nan obligacion di bon administracion financiero. Tur e añanan ey gobierno a keda financia cierto entidad sin cu tabatin hustificacion adecua riba mesa pa tuma tal decision; no a bin cambio den e situacion aki. A keda maneha e asunto di sector colectivo como un molester Hulandes cu cual mester a cumpli, pero ‘te ey’. Pero awor a bin otro fenomeno acerca. Tin entidad, manera AZV y SVb, cu a traves di e medidanan tuma den transcurso di ultimo añanan na e momento aki a logra acumula cierto reserva, cu segun e reglanan di e ley di supervision financiero (LAft) ta pertenece na e ‘surplus’ di e sector colectivo. Articulo 14, inciso 2, b, ta papia claramente di e “financieringssaldo van de collectieve sector”, cual mester ta por lo menos un saldo positivo di 1%. Awor naturalmente, cu ley den man, CAft ta recorda gobierno cu e surplus di e sector colectivo, cu tambe ta encera en todo caso e surplus di AZV y SVb, y ta haci e pregunta con e sumanan aki ta bira disponible pa acumula hunto cu surplus di Pais Aruba mes, pa stipula kico ta bay, segun ley, pa paga debe y kico ta bin disponible pa inversion. Nos no conoce reaccion di gobierno di Aruba ainda riba e asunto aki, pero lo ta bay tin uno pronto. Nos ta anticipa cu gobierno ta bay defende su maneho, unda entre otro a usa e beneficionan extra pa financia e aumento di salario cu a duna na tur cu ta cobra di gobernacion. Y nan no por bisa cu nan no a pensa cu CAft ta bay reacciona asina, pasobra nan a haya un advertencia mas tempran caba den e reaccion di CAft riba (cambio di) presupuesto 2024, unda CAft hasta a duna sugerencia pa financia e aumento di otro manera, no di e surplus cu tin un destino fiho segun ley. CAft ta mustra cu enfasis riba e importancia pa baha debe mas tanto posible. Mirando e desaroyo economico den e proximo añanan, cu lo ta hopi mas modera compara cu e empuhe enorme cu e recuperacion post-Covid tabatin, esaki lo tin su consecuencia financiero pa Pais Aruba. E propio proyeccion cu gobierno ta duna den su presupuesto multi-anual ta mustra cu e salto grandi di como Afl. 400 miyon mas entrada na 2023, compara cu e aña anterior, lo ta un hazaña unico cu no ta haya repiticion. Usa placa di e surplus pa paga extra salario, envez di paga debe o haci inversion, ta e idea mas garafal cu un gobierno por tin.

Pa colmo, tin otro asunto cu cual gobierno no ta cumpliendo. Desde 2024 e criterio pa gasto di personal no ta e suma menciona anteriormente, sino e totalidad di gasto di personal pa henter gobernacion, y no e ministerionan so. Esey ta encera entre otro e alto colegionan di estado, DOW y pago di personal contrata fuera di payroll. Te awor gobierno no a duna claridad tocante e totalidad di gasto di personal y e impresion ta cu a pensa di usa e incertidumbre di e cambio di maneho pa lanza e aumento di salario, cu vista claro riba eleccion na 2025. Djis aki nos lo ta scucha e lamento cu tin supervision financiero di Reino, net awor cu gobierno kier haci manera ta haya ta bon. E consecuencia, pa ken?