Diadomingo 28 di juli 2024 ta tumando luga eleccion presidencial na Venezuela. Durante un conferencia di prensa ayera mainta, e Comando di Campaña CONVZLA na Aruba a brinda e comunidad Venezolano na Aruba informacion importante tocante e dia aki.

Laura Luces, coordinador di e Comando di Campaña CONVZLA na Aruba, a informa cu dia 28 di juli for di 6or di mainta te 6or di atardi, ciudadanonan Venezolano cu ta registra pa vota mester asisti na e consulado di Venezuela na Aruba pa eherce nan derecho di voto. Unico cos cu ta necesario, el a splica, ta e ID Venezolano lamina, cual por ta vigente of caduca. Si e nomber di e persona ta aparece den e registro electoral, e por eherce su derecho di voto.

Luces a manifesta cu nan no tin ningun duda di e triunfo di oposicion. El a indica cu encuestanan principal serio di e pais ta duna un bentaha solido y contundente na e candidato di oposicion, Sr. Edmundo Gonzalez.

El a sigui splica cu manera tur eleccion nan ta bay t’ey presente bao di nan tent, banda di edificio di e consulado, pa duna tur informacion cu wordo solicita y contesta cualkier duda y pregunta cu e votadornan por tin.

Aunke hopi ta considera cu na Venezuela e resultado di eleccionnan casi semper ta termina den un fraude, tocante si nan ta spera un resultado diferente e biaha aki, Luces a splica cu semper tabatin fraude, for di tempo cu presidente Chavez a cuminsa tuma over tur e organismonan di Venezuela. “Nan ta tuma e mando di tur e institucionnan. Esaki no ta un eleccion ni husto ni transparente,” el a remarca.

Un di e obstaculonan cu oposicion a encontra ta e ausencia di e candidato cu a gana e eleccion primario di oposicion, Maria Corina Machado, pa motibo di e inhabilitacion cu e regimen a pone den su contra. E candidato cu a tuma e posicion di Machado ta Sr. Dmundo Gonzalez, ken ta e candidato oficial di oposicion, bao liderazgo di Maria Corina Machado.

“Nos no tin e menor duda cu ta bay tin fraude, nan ta bay haci tur cos posibel y imposibel, pero e biaha aki nan no tin e base social,” el a agrega.

Pa sigura cu e proceso di votacion bay lo miho posibel, Luces a splica, e biaha aki ta bay tin loke nan ta yama e “defensornan di voto” cu lo ta contando e votonan papel pa papel. Ademas, el a indica, e biaha aki ademas e testigo no ta bay ta su so, cual ta loke tabata sucede anteriormente.

E biaha aki tin e organisacion 600K cu ta permiti pa e testigonan di mesa wordo compaña pa nan no ta nan so y ta bay tin hende pa defende e testigonan na cada mesa electoral.

Pa loke ta e cantidad di votadornan, CONVZLA a splica cu actualmente tin 1.366 persona eligibel pa eherce nan derecho di voto na Aruba, pero durante e proceso cu CNE a habri pa tur Venezolano den exterior registra pa por vota, solamente 266 a logra inscribi di alrededor di 10 mil Venezolano cu tin na Aruba . Esaki ta debi na un cantidad di rekisito cu e regimen a impone pa ciudadanonan Venezolano.

Na Aruba tabata conta, entre otro, cu mester tin un permiso di residencia valido di mas di tres aña y cu mester ta registra na Censo. E mecanismo aki a wordo implementa na nivel mundial locual a haci cu miyones di Venezolano no por a registra pa vota den e eleccion presidencial di diadomingo.