For di diasabra ultimo, algun bisindario na Aruba ta bin enfrentando problema pa loke ta trata suministro di coriente. Esaki entre otro, pa via di accidente di auto y tambe pa fayonan di kabelnan bao tera, segun loke ELMAR a informa.

Mediante un comunicado di prensa, ELMAR NV a señala cu e prome incidente a tuma luga diasabra 20 di juli 2024, cerca di 11:40am, ora un vehiculo a hit & run un steunpaal resultando cu un palo di coriente bin abao y afecta e suministro di coriente. ELMAR su tecniconan a actua y pa 1:05 PM a reestablece e servicio di coriente pa e mayoria di e barionan afecta.

E di dos incidente di storing di coriente a sucede tambe riba diasabra 20 di juli 2024, pa 7:22pm. E causa di e interupcion aki tabata un fayo riba un kabel bao di tera. Durante e temporada di calor for di juni te cu september, e temperaturanan halto y aumento repentino di consumo ta afecta e condicion di e kabelnan y ekiponan di distribucion di coriente, cu por conduci na interupcion di suministro di coriente.

Pa 8:56pm por a bolbe suministra coriente y reestablece servicio na mayoria di e barionan afecta, mientras cu e trabaonan di reparacion tabata tuma luga den e area directamente afecta.

E di tres incidente a sucede ayera diamars 23 di juli 2024, cerca di 4:00pm den e proceso pa reconecta e bario di Savaneta door di un kabelstoring cu a surgi na San Nicolas, e substacion di Balashi cu ta suministra coriente pa Balashi, Santa Cruz y vecindario a desconecta di e grid di coriente.

A informa cu e substacion di Balashi ta suministra coriente na e areanan di un parti di Santa Cruz, Balashi, Savaneta, un parti di San Nicolas y vecindario. Alrededor di 4:28am Balashi y Santa Cruz a haya coriente back.

Debi cu dialuna ultimo den oranan di madruga alrededor di 2:51am a surgi un kabelstoring na San Nicolas. Nan a indica cu e tecniconan di ELMAR a identifica e problema y a logra isol’e. Durante e temporada di calor, e red di coriente ta experiencia un presion adicional cu por conduci na storing.

Pa 3:38am a cuminsa reestablece coriente pa e barionan afecta y mayoria di cliente tabata tin servicio di coriente back. Den proceso di restauracion, un componente di coriente den casita di coriente na Savaneta den e mesun red di coriente a sufri daño y afecta e suministro di coriente den e area. Pa 9:58am e ultimo 15 cas den e area di Savaneta a haya servicio di coriente back.

Pero e problema aki ta bin for di varios luna atras, april specificamente unda nan a registra 17 storing den menos di un luna. Den esaki por a recorda e brown out di diabierna 3 di mei a tuma luga debi na leakmento di fuel den turbina di gas e cual a tarda mas cu 6 ora pa por resolve e situacion di e dia ey. Pa esaki, WEB a señala cu “Debi na e leak y e peliger di candela no tabata responsabel pa mantene e turbina den operacion y conforme protocolnan di seguridad, personal di planta a haya nan mes obliga di baha e turbina di gas. Reparacion di e leak a tuma su tempo pero despues a surgi tardansa na momento di reset y restart e turbina. En total a dura mas o menos 6 ora prome cu tur bario afecta a recupera nan suministro di coriente.”

Mientras tanto, usuarionan riba rednan social ta reacciona mustrando nan mal contento cu interupcion di coriente mirando cu esaki ta nifica algo fastioso mirando cu Aruba ta den pleno temporada di calor na e momentonan aki.

E situacion di ELMAR te luna di mei ultimo segun Irausquin a splica ora nan a tene un conferencia di prensa pa splica e mesun problema aki ta cu na 2021 nan a haya un retraso den e parti di mantencion unda den pasado e maneho tabata diferente, e tempo ey e maneho tabata pa enfoca mas riba expansion di grid y pa traha mas trafohuis, tur esey a trece e consecuencianan aworaki door cu e maneho no tabata enfoca den mantencion di infrastructura.

ELMAR ta señala cu nan a bin cu un plan di mantencion, despues cu Irausquin a ser nombra como director na 2021 manera el a bisa, hunto cu Utilities Aruba N.V bao maneho di Richard Eman y ekipo tecnico, nan a traha un strategia nobo y pone como prioridad e mantencion di e grid.

Na aña 2021 nan a introduci un plan di cinco aña pa asina nan por ehecuta esaki debidamente, Irausquin a afirma cu e tabata un temporada hopi dificil net despues di pandemia unda e cadena di suministro tabata un problema hopi grandi pa ELMAR cu e material tabata tarda masha hopi mes pa yega Aruba, un ehemplo di esaki ta trafohuis cu ta tarda dos aña pa nan por ricibie na ELMAR.

Nan tin suficiente demanda y ora esey ta sigui crece nan ta haci nan parti di expansion pero e parti di mantencion no por keda atras y awor cu hotelnan ta biniendo, por ehemplo, esun di Sero Colorado, na unda nan a bisa cu e grid ta cla caba pero den e parti di mantencion ta e parti cu nan mester enfoca mas.