Miguel Mansur, Lider di partido ACCION21: “Reforma fiscal comprensivo ta keda e prioridad principal di e proximo gobierno”

Mirando cu eleccion ta acercando, partidonan ya caba a cuminsa informa riba loke nan tin plania pa haci, loke ta keda pendiente y mester di mas atencion y tambe loke nan a logra den ultimo tres aña, manera ta e caso di ACCION21. Lider di e partido, Miguel Mansur, den un declaracion pa Bon Dia Aruba a duna su opinion tocante esaki.

Den un sistema democratico, e voto ta e forma di por expresa poder, adkisicion social y control. E voto boluntario ta e forma cu un persona tin pa expresa su mes cu consenshi na momento di duna su voto pa eligi miembronan di gobierno, otro funcionarionan publico y representantenan.

Manera ta conoci, Mansur ta un empresario cu a biba algun tempo pafo di Aruba y cuatro aña pasa a dicidi di bira politico y lanta su mesun partido na Aruba. Na 2021, su partido ACCION21 a logra haya 2,019 voto pa por drenta Parlamento di Aruba cu e mencion di “Top 5 Vote-getter.”

Cu tres aña como parlamentario, Mansur a splica cu pa su persona “un reforma fiscal comprensivo ta keda e prioridad principal di e proximo gobierno y pa ACCION21.”

“Nos tin e ley di ouderschapsverlof y reforma electoral tambe canando. Economia y finanzas ta loke mas atencion mester haya pa economia funciona debidamente y tur Arubano por gosa di comodidad financiero. Reforma di nos sistema electoral ta keda importante, separa eleccion di parlamento y minister, cambia repartimento di restzetels y duna Arubano den exterior derecho di voto. Tur mester sosode pa haci nos democracia mas resiliente. Open government caminda gobierno ta completamente transparente cu gastonan, estudionan etc. ta keda falta pa pueblo por responsabilisa nos gobernantenan. Pilarnan economico nobo incluyendo produccion di magnesium lo ta parti di nos proximo plan di partido,” el a bisa.

Ademas e señala cu “reduci economia informal door di mehora acceso na sistema financiero y un solucion pa nos poblacion indocumenta ta otro prioridad.”

Ampliando un poco mas e informacion riba e ley ouderschapsverlof, ta papia di extension di verlof pa mamanan nobo di 12 pa 16 siman, na unda esaki seguramente lo ta un cambio cu hopi famia na Aruba lo aprecia. E cambio aki tin como meta pa mehora e bienestar di famia y alinea leynan di Aruba cu normanan internacional. E extension di verlof pa mamanan di 12 pa 16 siman ta sosteni door di estudionan cu ta mustra resultadonan positivo pa conexion entre mayornan y yiu, igualdad di sexo y un distribucion mas balansa di responsabilidadnan entre pareha.

E tempo di notificacion cu un empleado embarasa mester duna su dunado di trabou pa verlof ta baha pa 6 siman na luga di 2 luna. E cambio aki lo sirbi pa mehora flexibilidad di personanan embarasa, tumando den consideracion tambe e necesidadnan di dunadonan di trabou. E reduccion aki lo alinea nos leynan mas cerca cu Hulanda y islanan BES, cual ta 3 siman prome cu verlof. Si e baby ser hospitalisa durante e periodo di verlof, e dianan hospitalisa no ta conta den dianan di verlof.

E parti aki di e iniciativa di ley ta sigura cu mamanan tin e tempo y sosten necesario si nan baby mester di cuido medico extendi durante nan verlof. E maximo di extension adicional a ser estableci na 10 siman, dunando flexibilidad pa acomoda situacionnan medico variante.

Un di e topiconan cu mas a resalta di Mansur den ultimo tempo ta un di e parlamentarionan cu a haci impulso di matrimonio di mesun sexo pa lo cual el a sigura cu “como partido Liberal Progresivo nos ta para pa derechonan di cada ser humano den nan totalidad. Cada persona tin e derecho di biba, stima y forma nan famia den e forma cu nan ta desea y nos kier duna apoyo na nos diversidad. Nos lo cuminsa pa introduci schakelbepaling na union civil cu a keda introduci den nos codigo civil. Nos ta comprometi na derechonan humano y nos ta kere cu limita pareha di mesun sexo na union civil ta keda discriminatorio.

Comunidad LGBT+ mester tin acceso na tur derecho civil cu pareha heterosexual ta beneficia di incluyendo matrimonio.

Conhuntamente cu Ministerio di Enseñansa y Departamento di Enseñansa nos kier brinda un structura guia na scolnan pa hoben conscientisa tocante nos diversidad y retonan di comunidad LGBT+. Creacion di un sociedad mas inclusivo ta enrikece nos cultura y identidad. Igualdad ta hancra den nos statuut y ta algo cu Accion21 ta para firmemente pa y no ta kere derechonan humano mester ser logra door di consulta publico.

Algo cu recientemente Hoge Raad a dicidi recientemente caminda el a sigura cu “tabata un decision historico di Hoge Raad pa permiti matrimonio di mesun sexo na Aruba, un paso hopi importante pa un futuro mas inclusivo.”

Den su plan di gobernacion pa loke ta trata e parti social, tambe ta inclui e introduccion di e ley “Pro-Choice=Legalisa aborto.” Den esaki ta indica: “Como partido Liberal Progresista nos ta kere den autonomia di cada ser ariba su mesun curpa. Nos ta reconoce cu esaki ta un tema delicado y kier brinda tur ciudadano e guia y sosten pa nan por haci un decision informa y sigura cu e ta esun corecto pa nan. Nos ta reconoce cu abortus ta sosodiendo caba pero pa persona di menos recurso cu no tin acceso e por crea un peliger pa nan salud. Proteha e bida di e ser femenino ta un prioridad y nos kier combina esaki cu ayudo psicologico prome cu un decision asina importante y tambe despues di un abortus pa percura nan bienestar. Tambe ta importante pa terapia ta obtenibel pa e famia di e ser femenino mientras e ta considerando y tambe despues si ta necesario. Nos kier sigura cu e procedura aki ta existi di un forma sigur cumpliendo cu reglanan internacional pa esnan cu dicidi e ta e decision corecto pa nan na e momento ey.”