Paul Wong ta e artista encarga di pone su toke creativo riba e plataforma ubica na Palm Beach, cual sigur lo bira un punto di atraccion tanto pa hende local como turista proximamente, un trabao di remodelacion cu a cuminsa na 2018 conhuntamente cu Riu Hotel.

Enfoca riba embeyecemento di diferente luganan di Aruba, minister di Turismo y Salud Dangui Oduber a anuncia na december di 2022 un proyecto turistico nobo cu lo tin un impacto grandi tanto pa hende local como pa turistanan.

Ta trata di e plataforma cu ta dilanti di Riu Hotel unda cu minister Oduber a señala cu na aña 2018 nan a acerca e hotel aki pa yuda cofinancia e drechamento di e toren di e plataforma e tempo ey. E hotel Riu a bay di acuerdo pa financia e mita di e proyecto aki, pero a nota cu “den ultimo añanan debi na mal tempo y debi na tur loke tabata pasando den nos naturalesa y den nos awanan e platform aki a wordo afecta severamente, casi el a wordo kibra completamente y nos a haya necesario como Ministerio di Turismo y Aruba Tourism Authority pa percura pa busca e fondonan necesario pa por financia e drechamento di e platform aki”, el a señala.

Siguientemente, na october di 2023 a trabaonan di remodelacion a keda cla y a cuminsa cu e buskeda di artistanan local pa forma parti di e proyecto aki denomina ‘Palm Beach Art project.’ Anteriormente e plataforma tabatin e bandera di Aruba y turistanan ta haci uso di dje pa saca potretnan y publica nan riba social media y esey tambe ta e motibo di pakico nan ta haci un yamada na artistanan local pa participa den e request of proposal (RFP) pa asina nan por haya un idea of pensamento di kico mester pone den e toren pa bira un atraccion turistico back den area di Palm Beach.

Pa e motibo ey, a restringi e acceso pa un periodo di 8 dia, y finalmente 25 di juli awor comunidad di Aruba y publico en general ta bay aprecia e talento di e artista local caminda ayera mes minister Oduber a mustra un potret di e trabaonan y e pintura cu e toren aki ta bay tin.

“Turismo ta keda e driver di nos economia y p’esey ta sumamente importante pa nos keda inverti den producto Aruba. Minister Oduber ta sigui percura pa drecha y embeyece diferente areanan riba nos isla. Aruba ta di nos ban conserv’e,” e mandatario ta comenta.