Pais Aruba tin como tarea pa salvaguardia e interes publico. Brinda servicio publico cu ta confiabel y pagabel, y cu ta di importancia pa e sociedad, ta forma parti di esaki. Pa motibonan di eficiencia, por scoge pa pone cierto tareanan gubernamental na un distancia di gobierno, y Pais Aruba a haci uso di e opcion aki na hopi ocasion caba desde Status Aparte.

Sinembargo, ARA ta remarca cu haci uso di instancianan no ta nifica cu gobierno no mester cumpli cu su responsabilidad. Ehecucion di e tareanan door di e instancianan aki na un manera inadecua, ta afecta directamente e funcionamento di un pais y ta trece cune riesgonan financiero grandi pa finanzas publico.

E hecho cu ta pone instancianan na un distancia no por nifica cu nan ta for di bista of ta liber di duna cuenta y tampoco por ta asina cu esakinan ta trece gastonan adicional hopi halto pa Pais Aruba pa motibo cu ta crea areglonan sin duracion of costo defini pa por eherce tareanan publico.

Lamentablemente, ARA a constata den nan investigacion cu esaki si ta e caso. E organo ta indica cu pa diferente motibo e instancianan no ta logra realisa e metanan cu tabatin na bista na momento cu a pone nan na un distancia. Esaki no ta culpa solamente di e instancia mes, pero di Pais Aruba tambe.

E investigacion di ARA ta mustra cu den practica, gobierno no ta sigui e modelo cu a scoge na momento di independisa of incorpora e instancianan. Interferencia politico y mantencion di construccionnan vago ta visibel den henter e liña. Ademas nan ta resalta cu no ta sigui suficientemente e desaroyo y cambionan cu tin riba mercado, pa cual motibo e modelonan di maneho scogi den pasado no ta funciona mas y mester adapt’e.

ARA ta splica cu e situacion actual den cual varios di e instancianan ta presenta deficiencianan grave den nan funcionamento, ta traduci den finanzas publico cu no ta manehabel y fondonan publico cu ta ser gasta na un manera ineficiente, ineficaz y, den algun caso, te hasta ilegitimo.

Nan ta remarca cu te ainda ningun gabinete a logra tuma medidanan structural unda ta tene cuenta cu tur pagado di impuesto. Y actualmente cada pagado di impuesto ta contribui na e deficiencia y iregularidadnan cu tin pa añas caba.

E organo consultativo ta cuestiona con ta posibel cu mayoria instancia no ta cumpli cu nan deber di dunamento di cuenta, y con por ta posibel cu Pais Aruba, cu aprobacion di parlamento, aña tras di aña ta keda cubri gastonan di e instancianan aki sin pone como condicion estricto cu nan mester entrega nan cuenta anual.

E investigacion ta mustra cu a crea un situacion insostenibel durante decadanan y esaki ta debi na, di banda di Pais Aruba, cu no por duna ningun splicacion responsabel na e pagado di impuesto tocante kico a haci cu e placa di impuesto, cual ta ser gasta, directamente of indirectamente, na e instancianan.

ARA ta remarca cu ta deber di Pais Aruba pa tin control riba e instancianan pa medio di un vision amplio, integral y absoluto di locual ta trata e tareanan cu ta sirbi e interes general, na momento cu ta independisa nan.

Na mesun momento nan ta resalta cu esey no ta nifica cu mester tin interferencia politico den e instancianan, sino cu gobierno mester tuma medidanan apropia pa garantisa cu e instancianan cu no ta “den control” por bira manehabel. ARA ta agrega cu gobierno tin cu sigura cu na momento di pone un instancia na un distancia, cu lo opta pa un modelo di maneho robusto cu ta garantisa e bon funcionamento di e instancia.

E organo ta enfatisa cu practicanan actual no por continua di e mesun manera mas, y tanto Pais Aruba como e instancianan mes, mester mira e necesidad pa haci cosnan diferente y regla nan asunto na un otro manera.

Den caso di e modelonan cu ya no ta funciona mas of unda ya no a logra e obhetivo, ARA ta indica cu mester considera tambe e opcion di inclui e instancianan back den e mecanismo presupuestario en bes di mantene nan na un distancia. Nan ta remarca cu mester reforsa e supervision, tanto di parti di consehonan di supervision cu ta institui como tambe di parti di e propio ministernan encarga, pero evitando influencianan politico y cu mas transparencia.

Recomendacionnan

Pa loke ta trata e recomendacionnan cu ARA a presenta den e rapport, nan ta indica cu nan ta conta tanto pa Gobierno di Aruba como pa cada minister individual. Primeramente nan ta recomenda cu e retrasonan den entrega di responsabilisacion, den forma di entre otro cuentanan anual, keda elimina. Nan ta agrega cu mester percura tambe pa e instancianan cumpli cu nan deber di duna cuenta pa asina promove transparencia y mester pone tambe un fin na practicanan di areglonan di duracion, costo indefini y di solucionnan temporal sin base legal.

Nan ta menciona cu mester alinea e deber di duna cuenta den e regulacionnan concerni cu e Ley di Comptabilidad (CV 1989). Nan ta indica tambe cu mester ahusta e termino di responsabilisacion di e empresanan estatal di tal forma cu minister di Finanzas y Parlamento por dispone di e cifranan mas recien. Y nan ta agrega cu mester regla specificamente e deber di duna cuenta na Parlamento, door di e ministernan responsabel, pa e maneho hiba y e resultadonan di esaki.

E organo consultativo ta recomenda pa verifica pa cada instancia si e modelo actual, e responsabilidadnan determina y e modelo di supervision, ta esun adecua for di punto di bista di por logra obhetivonan publico y e maneho di fondonan publico. Nan ta recomenda tambe pa considera privatisacion y/of posesion den forma di accionista di parti di Pais Aruba, cu lo ta mas adecua den temponan actual. Si ta asina, nan ta indica cu mester bin cu mehoracion den gobernacion, mecanismo di financiamento, suministro di informacion y maneho interno y control.

Den caso cu no ta asina, nan ta puntra si tin posibilidad pa un of mas tarea bay back bao maneho directo di Pais of si un modelo di un concesion por ta un opcion.

Otro di e recomendacionnan di ARA ta pa bin cu un vision integral riba desperdicio, transporte y energia. Determina kico ta interes publico y kico mester ser realisa door di un partido publico of kico por ser realisa door di un partido priva. Determina tambe e opcionnan pa adaptacion di e forma huridico, desaroya esaki na un manera coherente y tene na dje den practica. Nan ta remarca cu mester pone interes di e ciudadano na prome lugar.

Nan ta inclui tambe cu mester alinea e reglanan tocante suministro di informacion y dunamento di cuenta na parlamento pa tur instancia. Esaki ta inclui cu ta manda tur presupuesto y cuentanan anual directamente na parlamento y por desvia solamente cu argumentonan valido.

Por ultimo ARA ta indica cu mester percura pa yega na definicionnan concreto pa empresanan estatal y fundacionnan publico. Den esaki mester argumenta e motibo explicito na momento di funda e instancianan aki y splica e motibo pakico ta necesario pa crea un instancia nobo. Nan ta menciona tambe cu mester haci uso di modelonan standarisa pa statutonan den cual specificamente e supervision y dunamento di cuenta ta wordo regla, y tambe pa regla cu ta obliga e instancianan pa entrega por lo menos nan cuenta y relato anual aproba na e minister encarga y e minister di Finanzas.