(NLTimes) – Tur vuelo na e aeropuerto Schiphol a ser retrasa of cancela diabierna debi na un ‘blackout’ global di Windows. E aeropuerto di Amsterdam tabata yen cu pasahero frustra cu tabata purba cuminsa nan vakantie. Pa 11:45 a.m., e CEO di Crowdstrike, e compania cu su software di ciber seguridad tabata tras di e ‘blackout’, a bisa cu nan a identifica e problema y ta implementa un solucion.
E ‘blackout’ a afecta diferente aerolinea na e aeropuerto Schiphol, hendenan no tabatin acceso na nan sistema di check-in, entre otro cos. KLM a cancela un gran parti di su operacion diabierna como resultado di esaki.
“Debi na un ‘blackout’ global di computer, vuelonan pa y for di Schiphol ta actualmente retrasa of cancela,” un mensahe cu tabata sali riba e ‘signboards’ di e aeropuerto tabata bisa y tabata ser ripiti a traves di e speakernan. “Controla e website di bo aerolinea pa mas informacion.”
Diabierna tabata inicio di zomer vakantie pa scol na e region noord di Hulanda, asina ta cu ya e tabata bay bira un dia hopi druk na e aeropuerto. Schiphol a bisa cu e distraccion tabatin un “gran impacto” riba e vuelonan.
KLM a pidi su pasaheronan pa no bay Schiphol si nan vuelo a ser cancela of retrasa seriamente. “Esaki ta nifica cu clientenan mester tene cuenta cu retraso y cancelacion,” e aerolinea Hulandes a bisa den un declaracion. “Nos ta consciente cu esaki ta causa un gran inconveniente pa nos clientenan, sobretodo awor cu e zomer vakantie a caba cuminsa. KLM ta traha duro pa restaura e operacion. Nos ta conseha tur pasahero pa tene un wowo riba e website of app di KLM.”
Diabierna tambe tabata hopi calor, sperando temperaturanan maximo di 30 grado na Hulanda. Bomberonan tabata reparti boternan di awa na e pasaheronan cu tabata warda na e aeropuerto.
E situacion tabata “caotico,” un reportero di NOS a bisa for di e lugar. “Pero tabatin hopi hende trahando pa alcansa y tuma contacto cu e pasaheronan pa sigura nan cu tur cos ta bay bon.”
Windows ta usa e software di ciber seguridad di Crowdstrike riba su computer- y servernan. Crowdstrike a confirma cu un ‘bug’ den su mas reciente actualisacion ta causa e “Pantaya Blou di Morto”. Computernan Windows ta keda restart.
Mientras ta trata pa soluciona e problema, Crowdstrike a ofrece un solucion alternativo cual ta de-instala manualmente e ultimo actualisacion. “E solucion alternativo ta hopi intensivo y mester ser realisa pa sistema,” e Centro di Ciber Seguridad di Hulanda (NCSC) a bisa. Nan a haya confirmacion for di algun parti cu esaki ta traha.
E solucion mas facil ta pa no instala e actualisacion. Si esaki ya a sucede, NCSC a publica instruccionnan paso pa paso pa drecha e proceso.
E ‘blackout’ tambe a afecta varios hospital. Rond di merdia, e hospital Singeland na Doetinchem y e hospital Scheper na Emmen a reporta cu nan a implementa e solucion alternativo y nan a haya nan sistema back online.
