E investigacion di Algemene Rekenkamer Aruba (ARA) den instancianan cu ta poni na un distancia di gobierno a enfoca riba seis instancia (Arubus N.V.; Post Aruba N.V.; Refineria di Aruba (RdA) N.V.; WEB Aruba N.V.; Serlimar y Fundacion Lotto pa Deporte) y di e seis instancianan aki, cinco tabatin resultado financiero negativo y uno so tabatin resultado financiero positivo pa e periodo di investigacion, cual tabata WEB Aruba N.V.

E Compania di Awa y Energia a bira autonomo pa medio di e establecimento di e N.V. Water- en Electriciteitsbedrijf Aruba (W.E.B.) N.V. dia 29 di augustus di 1991. Anteriormente WEB tabata un empresa di gobierno cu tabata cay bou di e minister di Asunto Economico y WEB tabata ser maneha riba base di un contract. Riba 14 di december 1992, e nomber a cambia pa Water- en Energiebedrijf Aruba (WEB) N.V.

Na november di 1992 a acorda cu Pais Aruba, den e marco di privatisacion, cu efecto riba 1 di januari di 1992, ta dun’e e autoridad y orden exclusivo na WEB Aruba N.V. pa asumi y continua e operacion di produccion di electricidad y awa pa bebe, como tambe e distribucion exclusivo di awa pa bebe. E autorisacion na e Pais pa e transferencia di e operacion na WEB Aruba a ser duna dia 1 di december di 1992. E autorisacion duna ta inclui tambe e transferencia di e propiedad di e articulo mobil cu ta sirbi pa e operacion menciona na e compania madre Utilities Aruba N.V.

WEB Aruba ta un compania di gobierno cu ta funciona como un utilidad publico y un monopolio natural. WEB Aruba ta ofrece un necesidad basico, cu ta e produccion y suministro di awa y electricidad. Pa suministro di coriente na cas y negoshi, WEB Aruba ta traha hunto cu su empresa ruman N.V. ELMAR. ELMAR ta cumpra electricidad for di WEB Aruba y ta bende esaki na cas y negoshi. E licencia exclusivo pa e produccion y suministro a ser duna basa riba e Ordenansa di Licencia di Electricidad.

Un punto principal di e privatisacion di WEB Aruba tabata cu e decision final ta keda den man di Pais Aruba, como unico accionista di Utilities Aruba, mientras cu e continuidad y calidad di e operacion di WEB Aruba ta ser garantisa pa e directiva.

E influencia di Pais Aruba riba e maneho di WEB Aruba mester ta di acuerdo cu e structura legal y e codigo di gobernacion, via e autoridad di e AvA. E autoridad ta ser eherci pa e compania madre Utilities Aruba. Den practica, tambe tin un liña di contacto directo entre e minister di Energia y WEB Aruba.

Den 2021, WEB Aruba, riba peticion di e accionista, a suspende su iniciativa pa e proyecto di LNG (Gas Natural Likido) pa implementa un iniciativa parecido inicia pa e Pais. Den esaki, Refineria di Aruba (RdA) a haci un proceso di Expression of Interest pa desaroya un proyecto di terminal di LNG na e localidad di e refineria caminda Eagle LNG Partners a selecciona. Den e Expression of Interest, e suministro di gas natural na WEB Aruba tambe tabata inclui. Riba peticion di e Gobierno di Aruba, via Utilities Aruba, WEB Aruba a cuminsa un dialogo cu Eagle LNG Partners pa discuti e posibilidad pa suministra WEB Aruba cu gas natural como un fuel di transicion.

Na december di 2021, WEB Aruba a celebra un acuerdo di compra cu Eagle LNG Partners pa suministro di gas natural pa un periodo di 20 aña, cu e prome entrega planifica pa mita di 2024. Esaki a ser posponi pa un fecha mas laat, despues di ricibi e licencia necesario. Den e ehempel menciona, no tabata cla con e interes publico y e interes di e compania tabata pisa contra e deseo di e Pais y con e Pais tin influencia directo. Informacion specifico riba e condicion di e contract di compra no a ser publica pa motibo di confidencialidad y clausula di secresia. E existencia y nocion di cualkier riesgo cu por tin consecuencia pa e Pais y henter e interes publico, den relacion cu contract aki, no ta conoci.

E periodo di investigacion di ARA den e institucionnan na distancia ta core di e periodo 2018 pa 2020. Mirando cu data actual di WEB Aruba tabata disponible durante e investigacion, e data di e añanan financiero 2021 y 2022 tambe a ser inclui den e analisis financiero detaya.

Den figura 4.1 por wak e resultado financiero di WEB Aruba pa e ultimo seis aña. WEB Aruba a ser scogi, entre e seis instancianan investiga den profundidad, como e unico cu resultado positivo den e periodo di investigacion di 2018 pa 2020. Den 2022 tin un excepcion aki, mirando cu tabatin un resultado negativo den e aña aki.

Den 2018 por wak un caida den e resultado final di WEB Aruba di Afl. 21.7 miyon. E caida den e resultado ta, segun e clarificacion den e cuenta anual 2018 di WEB Aruba, debi na un reduccion den benta di Afl. 11.8 miyon y un aumento di Afl. 22.4 miyon den e gastonan compara cu 2017. E gastonan mas halto ta mayormente debi na e desaroyo den e prijs di petroleo.

Aunke for di 2006 WEB Aruba a reduci gradualmente su uso di combustible di un promedio di 6,166 pa 3,694 bari pa dia den 2018, e presion halto den 2018 a causa cu e gastonan tabata mas halto. E gastonan di combustible den 2018 tabata Afl. 4.7 miyon mas halto cu den 2017, aunke e uso di bari pa dia tabata mas abou. Otro factor cu tabatin un efecto halto riba e gastonan tabata e devaluacion halto (Afl. 12.3 miyon) den relacion cu e devaluacion anticipa riba e ekiponan di generador di vapor y turbina y e gastonan di personal halto (Afl. 2.8 miyon).

Den aña 2020 tin un caida di Afl. 74 miyon den e benta como un consecuencia di e efecto economico di e brote di e pandemia di COVID-19. E caida aki ta grandemente neutralisa pa e caida den e total di gasto operacional di Afl. 66.4 miyon cu ta limita e caida den e resultado.

Den 2021 e bentanan ta subi back cu Afl. 17.7 miyon mientras cu e total di gasto operacional ta subi menos proporciona, esaki ta cu Afl. 9.8 miyon. Pa motibo di esaki, e resultado ta mehora compara cu 2020 cu Afl. 7.3 miyon.

Den 2022, WEB Aruba ta mustra un perdida di Afl. 27 miyon. Aunke tin un aumento di Afl. 52 miyon den e bentanan, tin un crecemento desproporcional den e total di gasto operacional cu ta ser mira. Esaki como un consecuencia di e presion halto di petroleo den 2022 cu a nifica un aumento di Afl. 116.2 miyon den e gastonan di combustible pa WEB Aruba.

WEB Aruba no tabatin contract di hedge pa 2022 pa proteha contra e aumento mundial di e prijs di petroleo como un consecuencia di e conflicto entre Rusia y Ucrania cu a surgi na cuminsamento di 2022. WEB Aruba tabatin e posibilidad aki, sinembargo e aprobacion necesario di Utilities Aruba no ser duna na tempo. Utilities Aruba ta reconoce cu pa hedging decision mester ser tuma rapido y cu pa motibo di esaki e proceso di aprobacion a ser adapta.

Aworaki e RvC di WEB Aruba so mester duna aprobacion pa scoge e strategia di hedge. E proceso aki ta ser conscientemente adapta pasobra e momento di hedging ta importante pa optimisa e strategia. Por lo contrario, hopi tempo lo ser perdi den e proceso di aprobacion pa e dos entidadnan, causa cu por pone den riesgo cu e beneficio di e strategia di hedge no ta ser logra.