Ayera atardi, Corte di Apelacion a duna su sentencia pa loke ta trata e Caso Avestruz na unda e sospechoso principal ex-minister Oslin Benito (Benny) Sevinger a haya como castigo 4 aña di prison cu 3 aña condicional y pa 5 aña e lo no por eherce ningun funcion publico, den esaki tambe 4 di e 7 sospechoso a ser declara liber.

Na momento cu Corte di Apelacion a caba di duna su veredicto, fiscal di Ministerio Publico di Aruba, Patrick van der Biezen, a duna su reaccion pa e caso aki indicando primeramente cu e sospechosonan Damira Nuñez, Edgar Werleman, Carlo Mansur y Curt Harms a ser declara liber di e acusacionnan den su contra. Den prome instancia, nan a ser sentencia y nan a bay den apelacion.

Pa loke ta trata Maria Leoncita Arends, e fiscal a señala cu el a ser declara culpabel pa estafa y soborno di funcionario publico, den caso aki Sevinger. Den prome instancia Arends a ser declara liber pa soborno di funcionario publico y Ministerio Publico a apela esey, ayera den sentencia di apelacion hues a indica cu a haya suficiente prueba cu a duna placa na Sevinger pa haya algo a cambio, den caso aki, erfpacht.

Apelacion a duna 24 luna di castigo pa Arends, di e cual 12 luna ta condicional cu un tempo di prueba di 3 aña. Arends a ser deteni pa e caso aki na 2021 y el a permanece cera 40 dia, mester menciona cu su yiu R. Richardson tambe a keda deteni como parti di e investigacion e tempo ey. Arends no a haya multa cu Ministerio Publico tambe a solicita pe.

Peter Susebeek tambe a ser condena pa soborno y labamento di placa di 1.3 miyon dollar, pa esaki fiscal van der Biezen a señala cu den prome instancia un parti di e caso di Susebeek a keda declara liber pero awor den apelacion el a ser sentencia pa soborna un funcionario publico, den caso aki Sevinger. Den prome instancia e castigo tabata di 24 luna di prison di e cual 12 luna tabata condicional cu tempo di prueba di 3 aña y aworaki el a ser sentencia na 30 luna di e cual 10 ta condicional cu un tempo di prueba di 3 aña.

Papiando di e castigo di Sevinger mes, e funcionario a splica cu Corte de Apelacion a sentencie pa soborno unda cu conhuntamente cu Arends a estafa pais Aruba unda cu a ricibi tambe soborno di Susebeek. Tambe a abusa di su funcion como minister unda cu den prome instancia den esaki a ser declara liber y aworaki den apelacion a ser sentencia pa esey y di ultimo, pa malversacion (verduistering) . E castigo cu Ministerio Publico tabata pidi ta 4 aña incondicional, cu pa 8 aña no por ta miembro di parlamento y pa esaki corte di apelacion a dicidi un castigo di prison di 4 aña di cual 1 aña ta condicional, cu un tempo di prueba di 3 aña y tambe cu e no por fungi como funcionario publico mas pa un tempo di 5 aña.

Awor, tanto Ministerio Publico como e sospechosonan por apela e decision aki den e siguiente dos siman na unda fiscal van der Biezen a señala cu Ministerio Publico ta bay studia e sentencia pa loke ta trata e otro 4 sospechoso cu a ser declara liber “pero mi ta kere den caso aki, e obheto di e caso no ta hinca den e otro 4 persona cu a ser declara liber, sino mas bien den e otro tres cu a ser sentencia pe.”

E sentencia di ayera ta confirma e sospecho cu Ministerio Publico tabatin for di principio

El a finalisa bisando cu Ministerio Publico tin e tarea y obligacion pa ley pa nan aplica ley penal “na momento cu tin persona cu ta comete un hecho castigabel, muy den particular, mandatarionan di Pais Aruba cu ta haci su mes culpabel di entre otro, ricibi placa y otro regalonan a cambio di fabornan, esey ta algo hopi grave y mester reacciona riba esey, mester persigui e personanan aki y trece e caso dilanti. E sentencia di awe ta confirma tambe cu e sospecho cu nos tabatin for di principio cu a ser confirma caba den prome instancia, awe atrobe a ser reconfirma door di apelacion cu e normanan cu nos ley penal ta dicidi na momento cu bay den pugna cune vooral como mandatario ta hopi serio. Pasobra na momento cu bo ta haci e actonan asina akinan bo ta bezig ta zaag practicamente e base di nos estado di derecho cu nos ta bibando den dje. Pa pueblo di Aruba no perde e confiansa cu nos ta suposs di tin di mandatarionan.”

Benny Sevinger: “Mi ta hopi decepciona y Ministerio Publico ta corupto”

Pa Benny Sevinger, e sentencia di apelacion aki a causa hopi decepcion pa su persona, “7 aña pasa ora nan a drenta mi cas mi a bisa un cos: “El que nada debe, nada teme” pero inhusticia hamas lo por gana husticia y keto bay e pelea aki lo sigui. Awe mi a haya un sentencia cu ni mi abogadonan ni a mi no por compronde con hues por yega na un sentencia asina,” el a bisa.

El a reacciona na loke Ministerio Publico a trece dilanti, “si tin un corupcion, esey ta Ministerio Publico, corupto Ministerio Publico ta y mi por prueba esey, den mi caso esaki sigur ta conta como un persecucion politico y cu un grupo di hende ta dicidi cu nos ta bay caba cu Benny Sevinger su bida.”

El a gradici na su votadonan, e 1.614 hende cu a vota pe ora e tabata cera den prison unda e no por a campaña “mi ta gradici nan di curason cu nan a para band’i mi y mi a haya mensahenan den dianan aki di forsa y cu nan ta keda para band’i mi.”

Den su opinion, ni Ministerio Publico ni huesnan por a mustra unda Benny Sevinger a keda haya placa di hende. “nan kier manda un mensahe pa politiek caminda e berdadero coruptonan cu ta sinta den Cocolishi na e momentonan aki, nan no ta bay nan tras. Nan kier manda un mensahe pa Evelyn, Dangui, pa tur di duna a mi un straf pa nan scapa nan cara. Si berdaderamente Ministerio Publico ta kere cu e juffrouw di Husticia ey su wowonan ta cera.”

Pa finalisa el a sigura cu e tin fe den Dios, su famia ta para band’i dje y cu e ta bay sigui e caminda pa bay Casacion, y si e no lo sali na su fabor tampoco “nos tin cu sigui bringa.”