Ayera mainta miembronan di sindicato FTA trahando na SVGA a bay den accion pa motibo cu segun e fundacion, no ta cumpliendo cu e contracto colectivo (CAO) pa asina duna trahadonan indexering manera a ser anuncia recientemente pa empleadonan publico.
Ayera mainta Stichting voor Verstandelijk Gehandicapten Aruba (SVGA) a dicidi di pone nan trabou plat y pa esaki Marlen C., ken ta fungi como shop steward di SVGA, a informa cu e motibonan pakico nan a dicidi di stop nan actividadnan ayera ta diferente, como por ehemplo pa indexering, cu nan no tin confiansa mas den directiva y door di esey a dicidi di bisti full na preto pa motibo di menasa, trahadonan desmotiva, entre otro.
Pa loke ta trata indexering, el a sigura cu siman pasa nan a haya informacion di gerencia cu e coordinador di gobierno tabata na caminda pa trece e formulario pa yena lo cual nan sa cu ta laat caba pa por haya e fondonan. Diamars ultimo nan a haya un carta indicando cu no lo paga e placa ey. Sinembargo, nan a haya sa for di FTA cu minister Rocco Tjon a sigura cu mester paga esaki. “Awor ken ta controla gerencia si e ta haci su trabou corecto of no? Ken mester paga gerencia of gobierno? Awor nos ta duda kico ta bay sucede,” el a bisa.
Manera ta conoci, Gobierno di Aruba lo duna e funcionarionan publico indexering entrante 1 di juli y di su parti, Hose Figaroa, presidente di FTA, a señala cu nan tin un CAO firma cu SVGA den cual ta bisa cu indexering ta wordo paga conforme e maneho di gobierno riba esey, loke ta nifica cu e trahadonan aki tambe tin cu haya indexering.
“E problema ta cu nos a compronde awor for di gerencia cu supuestamente lo no tin placa pa paga e indexering aki y di otro banda nos a compronde for di gobierno cu supuestamente ta e peticion pa haya e fondonan aki cual no a wordo haci,” Figaroa a expresa.
E confusion aki tin e trahadonan preocupa y rabia como cu e actitud di gerencia tampoco tabata mucho “cos di gaba mirando cu entre otro, a menasa cu si mester paga na e trahadonan e indexering aki lo mester kita hende pasobra no tin fondo.”
Di su parti, director general di SVGA, Els van Homelen, a señala cu nan tin hopi tempo caba bringando pa nan por haya un miho subsidio pa nan por paga indexering. “Nan tambe tin derecho y ora gobierno a cambia e sistema di subsidio, nos a haya un carta di e minister e tempo ey cu nos ta keda cu nos derechonan.”
Den su opinion, e bestuur no por dicidi pa duna e trahadonan si nan no lo haya e garantia di gobierno cu nan ta bay paga un extra suma pa e aña aki, cual ta mas di 200,000 florin pa por paga indexering pa tur trahado. Pa 2025 e suma ta dobel di loke mester bin na januari. “Gobierno mester compronde tambe cu a nos ta depende di nan pa por paga trahado,” el a finalisa.
