E sospechoso principal ex-minister Oslyn (Benny) Benito Sevinger, ken a ser condena den corte di prome instancia cu un castigo di 12 luna den cual 6 ta condicional, lo haya sentencia di corte di apelacion diabierna awor hunto cu e otro sospechosonan.

Caso Avestruz a cuminsa cu un investigacion di Landsrecherche tocante delitonan di corupcion cu posiblemente tuma lugar relaciona cu entrega di tereno di gobierno entre 2009 y 2017.

Den caso Avestruz a investiga e posible rol di Benny Sevinger y tabata dirigi riba e pregunta si companianan a haya derecho di erfpacht a base incorecto.

Oficialmente e caso a cuminsa na luna di september di 2022, pa varios dia e diferente sospechoso a acudi na corte pa interogacion tocante e fundacion Curason Berde. Un di e tres acusadonan a nenga di contesta e preguntanan di hues na comienso di e caso, ya cu segun el a indica, el a wordo interoga varios biaha como testigo y el a contesta casi 3,000 pregunta. P’esey el a sigura cu no tabatin necesidad pa contesta ningun di e preguntanan, lagando esey na su abogado.

Na mei ultimo, durante un siman henter, e caso aki tabata na corte di apelacion unda hues a scucha e circunstancianan personal di e shete sospechoso, OM a cuminsa splica primeramente kico tabata e nucleo di caso y despues a pasa detayadamente ariba e acusacionnan di cada un di e sospechoso di e caso aki, cual tur tabata presente den corte.

Pa e abogado general di OM, caso Avestruz ta draai rond di supuesto iregularidadnan cu tabata sucede den e proceso di otorgamento di opcion pa tereno erfpacht durante e tempo cu e sospechoso y actual parlamentario Benny Sevinger tabata fungi como minister di Infrastructura for di aña 2009 pa 2017.

OM ta indica cu e sospecha mas grandi ta cu Sevinger tabata entrega tereno(nan) na persona- y/of amigonan cu tabata vincula na su partido politico AVP, y e personanan aki no tabata usa dicho tereno(nan) pa proyecto, manera cu tabata ser indica, pero tabata pasa over na bende esakinan na prijsnan significantemente halto y e cual tabata na beneficio di e personanan aki como tambe di Sevinger.

Durante su rekisitorio Ministerio Publico a remarca cu ta trata un cuestion di integridad y cu no ta basa riba si e actonan cometi pa e shete sospechoso a bay manera cu ley ta prescribi of no. E abogado general a enfatisa cu e punto cardinal ta cu e sospechosonan, a traves di diferente compania a gaña di tin intencion pa desaroya proyectonan riba tereno comercial cu nan a ricibi, pero na final e meta tabata pa bende esakinan pa sumanan cuantioso y di e forma aki estafa pais Aruba.

Manera ta conoci tambe e caso di apelacion aki tabata basa riba e apelacion di tur shete sospechoso riba nan sentencia y apelacion di Ministerio Publico riba e sentencia cu Corte den Prome Instancia a duna na e sospechosonan Sevinger, Arends y Sussebeek.

OM ta sali di e punto di bista cu hues den prome instancia mester a sentencia e tres sospechoso aki riba algun acusacion specifico.

Pa loke ta e castigonan cu a ser pidi, den su mayoria e castigonan cu Corte den Prome Instancia a duna a keda mescos, pero den e caso di e tres sospechoso cu OM a apela nan sentencia, ta pidi pa hues principal tratando e caso di apelacion revoca e sentencia aki.

Den caso di sospechoso Susebeek OM a pidi tres aña, pero durante e prome caso el a ser sentencia na dos aña di prizon, di cual un aña ta condicional. Den e caso di Arends a pidi pa sentencia e sospechoso na tres aña di prizon y el a ser sentencia na dos aña, di cual un aña tambe ta condicional.

Por ultimo pa e sospechoso principal, Sevinger durante e prome caso OM a pidi inicialmente cinco aña y hues den prome instancia a duna un sentencia di un aña y seis luna di esaki tabata condicional. Pa loke ta e caso den HOF, OM a pidi un castigo di cuater aña di prizon, kitando e tempo di aresto preventivo, prohibicion di tin un funcion publico (di gobierno) y a kita su derecho di voto pasivo pa 8 aña largo.

Prome cu e tratamento di caso Avestruz a continua den corte, na mei ultimo tambe a tuma luga un “regiezitting” di un caso di expropiacion contra Sevinger.

Hues a determina, riba peticion di abogado di e sospechoso Sevinger, David Kock, cu e caso specifico aki ta bay cuminsa den luna di october pasobra e tabata kier warda pa e sentencia di HOF prome riba loke ta e caso Avestruz.

Den un Editorial publica den un edicion di Bon Dia Aruba di april 2023 a indica lo siguiente: Independiente di e resultado di e siguiente caso, e lo no ta un punto positivo pa campaña cu credibilidad, dunando un bentaha grandi na e otro partidonan, cu cada biaha por mustra riba e hecho cu e partido no tin ningun intencion di haci un ‘restart’ moral. Y pa corona obra, e persona en cuestion mes lo keda den parlamento, te dia cu tin un condena ireversible. Ya cu e mes ta tuma como punto di salida cu e por keda completamente liber di tur acusacion, e lo no ria y su Partido tampoco. E proximo añanan, e circo bergonsoso den parlamento lo no cambia, y Aruba ta keda hinca cu e berguensa cu no a percura pa ley, manera un pais drechi, cu ta impedi politico keda sinta den parlamento te dia pasa busca nan pa bay KIA.