(DW) – Corte Interamericano di Derechonan Humano (Corte IDH) diamars ultimo a publica un resolucion den cual ta ordena Nicaragua e liberacion di 25 persona considera como “preso politico” y tambe duna informacion di otro dos persona cu a disparce despues cu nan a keda deteni.
Den un resolucion di medidanan provisional, Corte IDH a rekeri na Nicaragua “procede na e liberacion inmediato” di e 25 persona aki deteni pa nan “participacion den actividadnan cu ta considera como acto di oposicion na Gobierno actual di Nicaragua, of ta trata di personanan cu un rol di liderazgo den comunidad religioso cu ta pertenece.”
“Corte ta constata cu e condicionnan di detencion di e personanan aki ta di gravedad extremo y ta rekeri adopcion di medidanan urgente pa evita daño ireparable na nan derechonan,” e resolucion a indica.
E personanan beneficia di e medidanan di Corte IDH ta Kevin Emilio Castillo Prado; Víctor Jobelni Ticay Ruiz; Sergio Catarino Castiblanco Hernández; Jacqueline de Jesús Rodríguez Herrera; Jonathan Euliecer Cruz Wuaguiz; Olesia Auxiliadora Muñoz Pavón; Anielka Lucía García Zapata; Melba Damaris Hernández; Freddy Antonio Quezada; Abdul Montoya Vivas; Eddy Antonio Castillo Muñoz y Nelly Griselda López García.
Ademas, Juan Carlos Baquedano; Carlos Alberto Bojorge Martínez; Walner Omier Blandón Ochoa; José Luis Orozco Urrutia; Álvaro Daniel Escobar Caldera; Juan Carlos Chavarría Zapata; Marcos Sergio Hernández Jirón; Juan Luis Moncada; Orvin Alexis Moncada Castellano; Harry Lening Ríos Bravo; Manuel De Jesús Ríos Flores; Cesar Facundo Burgalín Miranda y Marisela de Fátima Mejía Ruiz.
Den e lista aki tin periodistanan, docente, artista, empresario, activista, ex-militar, studiante, pastor evangelico, entre otro.
Corte IDH tambe a pidi na Estado di Nicaragua “pa adopta medidanan necesario y adecua pa determina y informa riba e situacion di Freddy Antonio Quezada y Carlos Alberto Bojorge, ken ta desaparecido.”
Tribunal internacional a ordena Nicaragua pa proteha e derecho di bida, integridad, y libertad personal, salud, y alimentacion adecua pa e personanan beneficia cu e medida provisional, asina como garantisa acceso di abogadonan di confiansa y abstene di enhuicia of tene represalia contra nan famia y representantenan.
Na November 2022, Corte IDH a declara Nicaragua den desacato, despues cu Gobierno di Daniel Ortega no a responde na un serie di resolucion den cual tribunal tabata exigi liberacion di “preso politico” y e proteccion di activistanan, disidente y persona Defensor di derechonan humano cu a ser deteni for di 2018 ora a cuminsa un serie di protesta contra Ehecutivo.
