Entrante 1 di juni 2024 a cuminsa cu un campaña di autonan bieu wacharaca cu ta para ariba tereno publico. Segun Relacionista Publico Robby Rosel di Bureau City Inspector, pueblo por yuda pa nos mantene nos Aruba limpi.
Relacionista Publico di Bureau City Inspector (BCI) Sr. Robby Rosel kier a haci un suplica na tur mecaniconan di “bou palo” of cualkier persona cu ta traha ariba auto pa tuma bon nota di locual ta bay sosode den e lunanan nos dilanti. Bureau City Inspector (BCI) ta hibando un campaña pa por kita tur autonan den mal estado cu ta ariba tereno di gobierno y cu no ta den un estado pa por ta ariba caminda, esakinan ta wordo considera como “autonan wacharaca”.
Tur dia BCI ta haya hopi reclamo di ciudadanonan tocante e autonan aki mal staciona of di mecaniconan cu ta keda pone tur e autonan aki ariba tereno cu no ta di nan. Actualmente trahadornan di Bureau City Inspector (BCI) a cuminsa bishita tur e sitionan cu ta wordo raporta via yamada y nos por bisa cu varios luga tin auto nan bieu y kibra ariba tereno di gobierno.
Bureau City Inspector (BCI) kier a haci un peticion na tur esnan cu tin auto sin nummerplaat valido para ariba tereno publico pa por cuminsa kita e auto nan aki. Nos kier haci e peticion aki specialmente na e doñonan pa por busca nan auto prome cu nos cuminsa ehecuta articulo 55 di Algemene Politieverordering, cu auto cu no tin number di auto paga, cu no tin seguro, cu no ta den bon estado pa ley y autonan cu ta para ariba terenonan publico lo wordo kita.
Tur esaki ta locual cu nos lo ta bay ta controlando prome cu nos laga kita e autonan aki. Si bo ta desea pa nos pasa wak luganan cu tin autonan bieu, por yama Bureau City Inspector (BCI) libremente 582-9777 of subi ariba www FIXI.aw pa bo raporta esaki. Si bo mes tin un auto bieu na bo cas cu bo kier benta afo por contact nos libremente.
