Clarita Britten tabata un persona masha conoci den comunidad unda el a bira popular despues cu atracador a drenta su cas unda el a dicidi di demostra su balentia y enfrenta e atracador cu su ocurencianan bisando “mi ta hende di credit card, mi no ta firmado di check sin fondo, loooocooo, mi ta hende di dollars.”
Diadomingo ultimo diferente persona, medionan y instancianan a informa riba e fayecimento di esun cu a pone e palabra “zeeeelooosss” den boca di tur hende na aña 2018 ora a ripara e presencia di un atracador na su cas y a conta su historia “Clarita ta mi nomber y Britten ta mi fam” el a señala den un entrevista.
Entre e instancianan cu a ofrece un palabra di condolencia ta Stichting Monumenten Fonds Aruba caminda nan a conta cu na 2018 Clarita a habri e portanan di cas di cunucu pa asina por a organisa un evento di Fiesta di Cunucu.
Segun diferente medio a reporta, Clarita no tabata bon di salud y lo a mester drenta den un tehuis y par di dia pasa a bay sosega.
Esaki sigur ta laga un mensahe na comunidad di un persona cu aunke e tabata un adulto grandi e no a demostra miedo den situacionnan di riesgo.
Di parti di Bon Dia Aruba nos ta manda palabra di condolencia na famia y amigonan cu Clarita Britten lo sosega na paz.
