(EFE) – Hefe di Shin-Bet –agencia di seguridad interno di Israel-, Ronen Bar, a biaha diadomingo ultimo pa El Cairo pa participa den negociacionnan pa un halto al fuego cu lo permiti haci un intercambio di rehen Israeli na cambio di presonan Palestino, segun e medio local Walla a bisa.

Segun Walla, Bar ta acudi na Egipto pa forma parti di combersacionnan pa haya sa e nombernan di e prizoneronan Palestino cu lo ser libera si e acuerdo lo tuma luga, asina tambe como riba e control den un futuro paso na Rafah, extremo di e Franha y frontera cu e bisiña sur di Israel.

E cruce aki tabata constitui e acceso principal di ayudo humanitario na un Gaza destrui, den cual 38,100 Palestino a muri, hasta cu a cer’e poco despues cu Israel a lansa su atake riba e ciudad di Rafah, cu ta prolonga pa mas di dos luna.

Diadomingo, ultimo prome minister Israeli, Benjamin Netanyahu, a publica un lista di su liñanan cora den marco di negociacionnan, entre nan contrabanda di armanan for di Egipto te Gaza a traves di e paso fronteriso.

Cu e biahe di Bar pa El Cairo, inteligencia interno Israeli ta uni na combersacionnan den cual a cuminsa forma parti diabierna di siman pasa e servicio di inteligencia externo, Mosad.

Hefe di Mosad, David Barnea, a haci un biahe corto pa Doha (Catar) pa reuni cu e prome minister y hefe di diplomacia di Catar, Mohamed bin Abdulrahman al Thani, pa discuti e proposicion plantia pa hamas diaranson cu lo inclui e liberacion di 116 rehen cu ainda ta keda paden di e Franha.

Barnea, ken a biaha su so sin e delegacion di negociacion completo, ta bay back Catar e siman aki cu tur su ekipo, cu ta inclui Ronen Bar of e mayor general Nitzan Alon, ken ta supervisa e combersacionnan na nomber di Egipto.

Asina mes, Egipto ta bay tin den su teritorio den proximo dianan e delegacionnan di Merca y Israel pa papia di cierto puntonan “pendiente” riba un posibel halto al fuego na Franha di Gaza.

Ambos banda ta mira di forma positivo e ronda di negociacionnan, nan ta insisti cu nan liñanan cora for di lunanan atrasa lo siguiente: Pa Hamas, alcansa e fin definitivo di e guera na Gaza, y pa Israel, logra su obhetivonan di guera cu ta caba cu capacidadnan militar y di gobierno di islamistanan, rescata tur rehen y garantisa e retorno sigur pa nan cas di esnan evacua na nort y sur di e pais.

“Cualkier acuerdo ta bay permiti Israel retoma atakenan back tanten tur obhetivo di e guera lo ser alcansa,” Netanyahu a bisa den un comunicado publica.

Mientras tanto, e guera ta continua. Por lo menos 40 persona a muri y otro 75 a resulta herido den atakenan Israeli den ultimo 24 ora na Franha di Gaza, segun ultimo cifranan di Ministerio di Sanidad di Gaza, controla pa Hamas.