Mucha muhe di 17 aña a bira e di 7 morto den trafico pa 2024

Ayera diadomingo den oranan di marduga a registra un accidente basta fuerte cerca di Tierra del Sol e cual a laga como resultado un persona di 17 aña morto. Mirando cu e fayecido no tabatin un identificacion cune, esaki tambe a trece dilanti hopi pregunta di comunidad cu a puntra dicon e chauffeur mes no a bisa na su momento, ken e persona aki tabata ta?

Por medio di un comunicado, Cuerpo di Polis ayera diadomingo a informa cu pa mas o menos 2:50 marduga Central di Polis a haya e notificacion di un unidad di polis cu un rato prome un auto marca Skyline color shinishi lo a casi dal frontal contra nan.

Nan ta splica cu nan a bira pa bay atende cu e chauffeur di auto pero a perde for di bista. Un rato despues a topa cu e auto accidenta den bocht di Tierra del Sol. Na yegada di e unidad, a topa cu e Skyline shinishi banda di caminda parti den dos y full total loss.

Na e sitio di e sucedido a pidi ambulance cu maximo urgencia mirando cu e mucha muhe cu tabata pasahero den e auto no tabata reaccionando y vocero di Polis den declaracionnan pa otro medionan di comunicacion a señala cu materiaalwagen di brandweer mester a haci su trabao pa por logra saca e mucha muhe for di auto.

Ambulance a yega na e sitio pero no por a haci nada mas pa e mucha muhe, e cual tabata yama Dariana I. Heredia De La Rosa naci na Republica Dominicana dia 25 juli 2006 y ken tabatin 17 aña di edad.

E chauffeur di e Skyline a keda deteni pa mas investigacion. Specialista di Trafico a presenta na e sitio como tambe polis tecnico y docter forensico pa haci nan investigacion. Departamento di Slachtofferhulp tambe tabata presente pa brinda sosten.

Comunidad mes a keda den shock mirando cu esun cu a perde su bida ta un persona hoben, sinembargo, e caso aki ta den investigacion ainda.

Lamentablemente, e caso aki ta involucra dos hoben y un di nan a keda marca pa henter su bida, unda ainda no ta conoci e motibonan ni tampoco con e suceso a tuma luga, ni si e chauffeur tabata bao efecto di alcohol ademas cu e tabata coriendo un auto hunto cu un menor di edad den oranan laat di anochi.

Cierto ta cu autoridadnan tin den nan man e responsabilidad pa aclaria e caso aki y mayornan e deber di papia cu nan yiu tocante e peligernan cu tin riba caya, e cual pa hopi biaha ta traduci den dal drinks y trip cu amigonan.