(France24) – Presidente Rusiano, Vladimir Putin, diahuebs ultimo ora cumbre di organisacion di Cooperacion di Shangai (OCS) celebra na Astana a culmina, a rechasa un halto al fuego cu Ucrania prome cu lo logra acuerdonan cu resultadonan “ireversibel riba Ucrania y aceptabel pa Rusia.”

“Nos no por simplemente anuncia un halto al fuego cu speransa cu e parti contrario lo duna algun pasonan positivo.” El a bisa.

Ademas, a hustifica cu Gobierno Ucraniano “no por controla tur su formacion arma, ya cu supuestamente tin algun di nan cu no ta sigui instruccion di autoridadnan central.”

Pa e motibo ey, Putin ta insisti “cu no por permiti pa enemigo lo probecha di un halto al fuego pa mehora su posicionnan, rearma of completa su ehercito mediante un mobilisacion forsa pa keda cla y continua cu conflicto arma.”

Den e cumbre, den cual e presidente Turco, Recep Tayyip Erdogan, tambe a acudi, Putin a lansa un declaracion na fabor di e varios intento di mediacion na Ankara, a enfatisa cu Rusia ta mira cu bon wowo cualkier intento di mediacion y a recorda e rol di Erdogan durante negociacionnan na Estambul.

Den sentido ey, prome minister di Hungria, Viktor Orban, cu ta bay biaha Moscu pa Cumbre di Estadonan Turco ta parce cu lo tin un entrevista cu e lider di Kremlin pa papia di nan relacion bilateral, na unda tambe kier pone Ucrania riba mesa.

Orban y e presidente Ucraniano, Volodimir Zelenski, a mantene un encuentro e siman aki den cual e prome minister di Hungria a pidie pa considera negocia un halto al fuego cu Rusia cu lo permiti “acelera” e conversacionnan di paz.

Pero, riba un posibel negociacion lidera pa Hungria, pais cu a caba di asumi presidencia di Union Europeo (UE), presidente di Conseho Europeo, Charles Michel a bisa cu “No tin mandato di papia cu Rusia” na nomber di e club comunitario.

“Presidencia rotativo di UE no tin mandato pa dialoga cu Rusia na nomber di UE. Conseho Europeo ta claro: Rusia ta e agresor, Ucrania ta e victima. No por celebra debate riba Ucrania sin Ucrania.” Michel a bisa den un mensahe riba e red social “X.”

Pa loke ta trata Merca, Putin a sigura cu no tin duda cu e candidato presidencial republicano, Donald Trump, ta bisa e berdad den su intencion di caba cu e guera na Ucrania. “Loke señor Trump ta bisa, como candidato presidencial, riba su disposicion y deseo di stop e guera na Ucrania, nos ta tume na serio,” el a afirma.

Den e debate entre Trump y Biden, Trump a expresa e rechaso na iniciativa Rusiano pa pone fin na e guera di Ucrania, den sentido ey, Putin a laga sa cu e candidato pa Cas Blanco lo compronde “tardi of trempan” su proposicion pa motibo cu “no tin alternativanan.”