“A bira imperativo pa e miembronan di e actual gabinete asumi nan responsabilidad politico y duna cuenta na Parlamento di Aruba,” parlamentario independiente, Gerlien Croes a indica den un comunicado di prensa. “Integridad no por continua como un palabra bunita, pero bashi.”
E accionnan rond di e investigacion hudicial den Ministerio di Labor y Integracion ta ilustra na pueblo claramente con e Gabinete Wever-Croes ta midi integridad, no cu dos, pero cu tres midi of mas. Den pasado un carta di ministerio publico so tabata suficiente pa a disolve gobierno di Gabinete Wever-Croes 1; mas despues riba investigacion y caso pa cu Arubahuis, e prome minister a abstene di duna cuenta na Parlamento bou di e argumento di no interferi cu investigacion andando; y te ainda awo cu RST, entre otro, a tene inval den propio oficina di Minister di Labor y Integracion, tampoco Premier Wever-Croes ta mira necesidad di tuma un paso firme den nomber di integridad den su gobierno.
Parlamentario independiente, mr. Gerlien Croes ta mira e necesidad y urgencia pa mehora e procesonan den e aparato gubernamental pa asina brinda mayor transparencia, tanto pa publico, como pa Parlamento di Aruba. No ta rasonabel pa warda añanan largo y cada bes riba investigacion y tratamento di casonan penal ta papia di tuma e decisionnan necesario pa ahusta e rumbo di e maneho di e pais.
Den cuadro di esaki, hunto cu parlamentario Ryçond Santos do Nascimento y Miguel Mansur, a pidi presidente di parlamento, mr. Edgard Vrolijk pa dos reunion publico cu urgencia. E prome cu Minister di Integracion cu ta esun, kende su Ministerio ta directamente envolvi den investigacion pa cu un caso penal, ademas di e titular di Integridad, Minister Ursell Arends.
Mientras cu e peticion pa e reunionnan publico a sali dia 8 di juni, presidente di parlamento a reacciona pa comunica na e parlamentarionan en cuestion cu lo honra nan peticion pa un reunion publico. A indica cu, mirando con e fecha di inicio di reces ta acercando, (simultaneo cu e ciere di aña escolar) ta anticipa cu un reunionnan lo por tuma luga despues di reces, ora cu Parlamento reactiva den augustus.
Gerlien Croes ta considera crucial pa haci un diferencia entre e investigacion hudicial y e responsabilidad politico cu e minister ta carga. Relaciona cu esaki, a bin bek riba un conseho cu Raad van State a duna dos aña pasa y ta enfatisa e importancia di e responsabilidad ministerial den cuadro di e cumplimento di control parlamentario.
“P’esey ta acepta generalmente cu e minister mester ta responsabel di tur loke ta sosode bou di su liderazgo den e aparato gubernamental y tambe ta esun, cu si ta necesario, mester implementa e cambio desea den politica y/o implementacion di procesonan,” Raad van State ta indica. Tambe mester promove integridad y preveni corupcion y responsabilisa politicamente na e organo di mas halto di e pais.
Den caso di Minister Arends, e ta responsabel di promove y garantisa e integridad administrativo den e aparato gubernamental. Mas aleu Croes y otro parlamentario kier scucha for di dje kico ta haciendo den oficina di Integridad Aruba cu ta resorta bou di su ministerio. Echo ta cu minister ta keda responsabel pa su empleado publico. Awo mas cu nunca cu a crea un ministerio di integridad, representantenan di pueblo ta exigi pa sa kico ta loke e ciudadano ta paga p’e.
