Ariba rednan social e publicacion di un ciudadano local riba un pagina dedica specificamente pa turistanan a ricibi basta reaccion. Ta trata di un ciudadano preocupa y alabes disgusta pa e falta di respet cu ta tuma luga na Kapel di Alto Vista di parti di algun turista, como tambe localnan.

“E post aki ta specialmente pa tur mi kerido amigonan local Y no-local y bishitantenan… Permiti mi haci un pregunta simpel: Tin algun lugar sagrado na bo pais cu ta permiti cu ken cu ta bay drenta cu un boter di cerbes den nan man y/of mita habri? Mi ta sinti hopi sorry pa bisa esaki pero un hende mester bisa: Esaki ta un falta di respet tremendo!,” e ciudadano indica den e texto cu tabata compaña pa dos potret: uno di un persona den kapel sin t-shirt y otro den kapel cu cerbes den man.

“Y bo sa kico mas? Cu algun hende no tin ni un tiki di berguensa y e actitud cu nan ta duna bo ora bo pidi nan pa laga e lugar pasobra esaki NO ta aceptabel na Aruba! Definitivamente no ta parti di nos cultura! Por fabor, tin un tiki di decencia y respet, e ta e minimo cu nos por pidi. Masha danki,” el a termina.

Kapel di Alto Vista ta un luga di adoracion cu tin un gran balor historico y cultural. E kapel ta un testament di e herencia catolico di Aruba y awendia e ta para como un monumento stima y alabes un destinacion popular pa turistanan cu ta busca trankilidad y consuelo spiritual.

Pa e ciudadanonan di Aruba Kapel di Alto Vista tin un significado religioso y cultural profundo. E ta un luga caminda localnan ta bay pa celebra eventonan religioso y tur diamars 5:30 di atardi tin servicio di misa.

Como cualkier otro misa, ta spera cu hendenan ta tene nan mes na reglanan di sentido comun cu ta demostra respet pa un cas spiritual y religioso, manera por ehempel bisti decentemente, no drenta cu bebida alcoholico y no humamento den kapel, entre otro. Pero esaki, manera e ciudadano a demostra riba Facebook, no semper ta e caso.

E publicacion a ricibi basta reaccion, di parti di tanto turista como local. Den su mayoria hopi ta di acuerdo cu e punto di bista cu e ciudadano preocupa y disgusta. Ta señala cu e ta berdaderamente un falta di respet pa drenta cualkier kapel, cualkier luga religioso di e forma aki, sin importa si bo ta turista disfrutando di bo vakantie of no.

Di otro banda tin usuarionan cu a señala cu en berdad e ta un luga religioso cu mester respeta, pero net pafo di e cura di e kapel mes tin establecimento cu ta bende bebidanan alcoholico y ademas tin tournan cu ta pasa na e kapel despues di haci recorido na otro partinan di Aruba, manera conchi y lama. Turistanan ta baha den bikini, zwempak of shorts pasobra esey ta loke nan a sali cune bisti, teniendo na cuenta e stopnan cu nan ta haci, e actividad riba su mes y sin lubida e clima di Aruba.

Por ultimo usuarionan ta lamenta cu esaki ta e tristo realidad y cu desafortunadamente e kapel ta ser considera mas un atraccion turistico, cu un santuario religioso y spiritual cu hendenan cu ta bishita e luga mester dun’e e respet cu e merece.