Un potret di restauracion crea pa un compania di arkitectonan local a genera un reaccion di Stichting Monumenten Fonds (SMF) pa loke ta trata e restauracion di Cas Veneranda, unda nan a aclaria cu aunke nan ta admira e talento y creatividad local, esey no ta e diseño oficial cu Cas Veneranda lo tin na final di e proyecto.

Ta parce cu un compania a recrea un diseño di Cas Veneranda di un manera diferente na esun cu tin plania di haci realmente y Stichting Monumenten Fonds mediante un publicacion riba Facebook a dicidi di bin dilanti y splica cu “Nos ta admira grandemente e talento y creatividad local mustra den e diseño. Sinembargo, nos kier aclaria cu esakinan no ta e diseño oficial di proyecto di restauracion di Cas Veneranda. E preparacion di documentonan di e proyecto ta den man di un ekipo di construccion bao direccion di nos director. Nos ta lamenta cualkier informacion incorecto cu a ser comparti.”

Diferente opinion a ser comparti pa cierto usuarionan di rednan social caminda algun di nan a indica cu e diseño tabata solamente un concepto y cu nan no tabata pretende causa ningun confusion.

Pa otronan e concepto tabata hopi bunita y hasta a pidi pa mantene e cas di e manera mas original posibel.

E compania encarga di e diseño oficial ta Hoevertsz ArchiDesign N.V. conoci pa traha den diferente restauracion di varios monumento na Aruba.

Sinembargo, esnan cu a duna un otro idea pa Cas Veneranda den e post publica pa Stichting Monumenten Fonds a splica cu “nos kier cuminsa na bisa cu no tabata nos intencion pa desmenti Hoevertsz ArchiDesign N.V. su diseño oficial, sino simplemente nos a duna nos punto di bista con nos lo a propone un diseño na Stichting Monumenten Fonds Aruba y na pueblo. Loke ta interesante pa splica ta e proceso na con nos a yega na e concepto aki, usando e “Exhaust Opportunities Method” populariza door di Architect Bjarke Ingles, di cual nos a crea +/- 40 concepto y despues adapta e cu “Design Iterations” pa por yega na e concepto cu nos a presenta sin tin ningun mapa.”

Ademas, nan tambe a indica cu “nos lo haci nos maximo esfuerso pa ta presente na e “Open Monuments Day Aruba” dia 15 September 2024 pa siña mas di nos monumento. Na final di dia nos tin mesun intencion cu Stichting Monumenten Fonds Aruba, pa preserva y promove nos historia y arkitectura local.”

Proyecto di Cas Veneranda a termina su prome fase di restauracion siman pasa.