Turistanan cu ta opta pa bishita Aruba tin expectativa halto. E slogan “One Happy Island” ta brinda e turistanan e sensacion di un isla feliz, sigur, limpi y caminda cu nan no tin ningun preocupacion mientras nan ta disfruta di nan vakantie.

Turistanan ta scoge Aruba pa e lama bunita, e santo blanco, e calor di solo y un clima cu mayoria dia di aña no ta cambia mucho y nan ta spera for di e momento cu nan sali for di e portanan di Aeropuerto Internacional Reina Beatrix, cu nan lo disfruta di “first class experience.” y Aruba, como un di e islanan mas caro den Caribe, ta spera di duna esaki. Pero tin algun aspecto cu ta causa un impresion no mucho positivo riba e turistanan.

Pa tin un idea di kico berdaderamente ta e prome impresion di un turista na momento cu e yega Aruba y traslada for di aeropuerto pa e area di hotel, cu ta caminda mayoria di turista ta scoge pa hospeda, reportera di Bon Dia Aruba a haci e recorido aki y por a tuma nota di algun aspecto cu mester mehora pa turistanan por tin e experiencia di primera clase na Aruba.

No ta un secreto cu actualmente tin un problema di sushedad na Aruba y desde cu e dump na Parkietenbos a cera, e problema aki a empeora. Tin un cantidad di dump ilegal na diferente parti di e isla y aunke riba e ruta cu mayoria turista ta pasa pa yega na nan localidad final no tin dumpnan grandi di sushi, esey no ta kita cu tin sushedad cu ta un bista mahos.

For di e rotonde di aeropuerto te na rotonde di Las Americas, Cas di Cultura, na banda di caminda tin diferente spotnan cu sushi ta visibel for di caminda y cu mas cu claro no ta un bunita prome impresion pa turistanan.

Un escultura cu ta hala atencion ta e escultura di e parha condor cu ta riba Plaza di Gradicimento, situa dilanti PriceSmart. Riba y rond di e plaza aki tin un cantidad di sushi y ademas e falta di mantencion di e plaza tambe ta laga hopi di desea.

Te na retonde di Cas di Cultura, specificamente pega na e heki di tereno di aeropuerto tambe por a tuma nota di hopi sushi cu poco poco ta acumula. Esaki ta un area cu hopi turista, pero tambe local, ta frecuenta. Ta di spera cu e ruta aki ta ser bon manteni y cu no tin sushi ta acumula.

Mester remarca cu for di e rotonde di Las Americas te na e retonde di Wendy’s/Harbour Arena e ruta ta bon manteni y cantidad di sushi cu tabata visibel tabata minimo. Pero ya despues di e rotonde aki e cantidad di sushi ya a cuminsa bira visibel atrobe y esaki ta simplemente demostra cu e esfuerso ta wordo haci pa cierto areanan, enbes di pa henter e isla.

Den e area hotelero, area turistico tambe e cantidad di sushi visibel ta lamentabel. Hopi boter di plastic, cups, saco y hasta palletnan ta wordo laga banda di caminda y poco poco ta acumula y ta crea un mahos bista pa turistanan.

No ta un secreto tampoco cu Aruba no tin e miho careteranan. Hopi buraco, y esaki ta teniendo na cuenta cu ta trata solamente di un ruta, for di aeropuerto pa area hotelero. Aunke no tin buraconan grandi ni buraconan cu ta no ta tapa, e estado di e careteranan no ta optimal. Pues manera ta custumber ta prefera di tapa e buraconan cu un capa di asfalt ora cu nan sali y esakinan no ta keda 100%.

Turistanan ta scoge pa bin Aruba, locual no ta barata. Costo di e isla a subi, gasolin ta caro, cuminda ta caro, estadia ta caro y apart di esaki nan tin cu paga diferente impuesto tambe. Sin conta e efecto cu e escasez di personal den e sector horeca por tin riba e servicio cu e turistanan ta ricibi.

Aruba ta un di e destinacionnan mas popular den Caribe, ta spera cu e autoridadnan concerni pone atencion y mehora e aspectonan aki pa duna e turistanan locual nan merce y ta paga pe.