(DW) – Polis Nacional Spaño a descubri un di e organisacionnan criminal mas grandi, pa loke ta trata number di victimanan afecta, cu na Spaña ta dedica na explotacion sexual di muhenan di origen Latino Americano, un operacion cu a caba cu e detencion di 25 persona.

Solamente durante e lunanan cu e investigacion a dura, mas di 500 muhe, mayoria di nan Colombiano, a ser abusa na Ciudad di Malaga na sur di Spaña, segun Polis a informa.

E condicionnan di trabou imponi pa e organisacion criminal tabata di abuso y tabata pone den riesgo grave e salud di e muhenan. Tabata obliga nan pa traha 24 ora di e dia, shete dia pa siman, ademas nan no por eligi ni rechasa ni un cliente of servicio cu mester a haciele sin usa proteccion, loke a causa cu varios muhe a contrae malesanan di transmision sexual.

Ademas, pa eherce un control mas grandi riba nan, nan tabata bao vigilancia permanentemente a traves di camaranan instala den e luga cu nan por a bandona pa dos ora so pa dia cu autorisacion previo di esnan encarga.

A libera caba 11 victima y di e 25 persona deteni, ocho a drenta prison. Agentenan a clausura e cuatro piso di edificio cu tabata sirbi como prostibulo di e red y a realisa registronan na otro propiedadnan den cual a logra haya 145,338 euro cash y 1.2 kilo di cocaina.

E trama, cu tabata perfectamente structura y tabata conta cu un number halto di miembronan, tabata capta un parti importante di e victimanan na nan pais di origen, principalmente Colombia.

E muhenan, den un mal situacion economico, tabata wordo gaña pa biaha Spaña cu den hopi caso tabata un oferta di trabou falso na un centro di estetica cu e organisacion tabata posee na e pais ey.

Sinembargo, un bes den teritorio Spaño, tabata informa nan di e debe cu nan a haya y e gastonan di e biahe, tabata adverti e victimanan cu nan mester a paga eherciendo prostitucion, aunke e debe no tabata stop debi na sancion y multa sin hustificacion.

Ta calcula cu e trama aki tabatin un beneficio anual cu tabata supera un miyon y mey euro, unda tambe nan tabata dedica na distribui substancianan den e pisonan cu nan tabata controla y tabata obliga e muhenan pa consumi tambe, ademas di fomenta su uso entre clientenan cu e obhetivo cu e servicionan lo a dura mas tempo pa genera mas beneficio, loke den algun caso tabata causa lesionnan pa e victimanan.

E investigacion aki a cuminsa a traves di denuncianan ricibi na e number di telefon pa meld trata di personanan, asina ey e investigacion a cuminsa danki na colaboracion di comunidad y denuncia anonimo.

Aña pasa a registra mas di 600 victima di trata na Spaña.