Luna di juni ta un luna unda a experiencia un ola di calor basta intenso cu ta afectando otro islanan den Caribe, gobiernonan ta atribui esey na fenomeno climatico “El Niño” cu ta provoca temperaturanan record y condicionnan di secura mas amplio unda Aruba, no ta keda afo.

Pa via di e motibonan aki, na nos mesa di redaccion a yega e informacion cu cuenta di coriente di algun ciudadanonan a subi na luna di juni y pa esaki PR di ELMAR, Audrey Croes a señala cu tur aña e peak durante luna di juni ta bin aumentando.

Pa loke ta trata e cifranan, ELMAR a indica cu e peak pa lunanan di juni ta lo siguiente: 2021 – 116 MW, 2022 – 120 MW, 2023 – 136.5 MW y 2024 – 148.4 MW na unda na comienso di e luna di juni ultimo Aruba a experiencia un ola di calor.

Aña pasa e peak na juni tabata di 120 MW, juli – 129 MW, augustus – 140 MW, september 144 MW y october – 141 MW.

“Dus e ta keda aumenta di juni te cu september, cual ta den pasado e luna di mas calor cu consumo mas halto,” Croes a sigura.

ELMAR y WEB Aruba a bati alarma na juni
 E dos compania encarga cu consumo di awa y coriente ELMAR N.V y WEB Aruba N.V a bati alarma na comienso di luna di juni ultimo pa loke tabata trata consumo di coriente caminda temperaturanan halto y crecemento di economia y turismo ta hungando un rol basta importante den esaki.

WEB Aruba N.V mediante un comunicado di prensa a señala cu dia 4 di juni ultimo nan a constata e situacion cu biento lo a cay completo den curso di dia, cu consecuencia cu lo no tabatin suficiente produccion di energia di biento.

Teniendo esaki na cuenta y cu tin unidadnan den mantencion, e dia ey a dicidi di baha WEB su propio consumo di energia, ademas WEB mesora a tuma contacto cu diferente consumidor grandi di energia, pa wak kico nan lo por a haci pa baha e consumo mas cu nan por, of pa start nan generatornan, durante e orario pik di diamars atardi/nochi entre 6or pa 10or.

Por bisa cu esunnan cu WEB a acerca a duna tremendo cooperacion y cu nan tambe ta wak e importancia pa e produccion di coriente y pueblo di Aruba keda cu coriente.

Di e forma aki WEB por pasa den e pik sin cu mester interumpi coriente pa asina por cumpli cu demanda.

Dia 4 di juni e demanda pa coriente tabata extremo y riba 156 MW, compara cu 145 MW na mei 2023, entretanto ELMAR a manda un comunicado cu peticion na comunidad en general pa nan cooperacion di usa menos coriente posibel, e aumento drastico den demanda di coriente ta consecuencia di un combinacion di factor manera aumento di temperatura y crecemento di economia y turismo.

ELMAR N.V a haci un apelacion na nan clientenan pa coopera y reduci consumo di coriente rapidamente e dia ey den oranan di anochi, pa asina comunidad coopera pa por mantene e suministro di coriente pa un y tur.

Nan a ricibi e informe for di WEB Aruba N.V. cu tabatin un reserva minimo di produccion di coriente (megawatt) disponibel compara cu e demanda di coriente cu e pais ta rekeri.

Si e demanda di coriente lo a surpasa e limite aki, ELMAR lo mester a inicia e proceso di load shedding, load shedding ta nifica cu cierto area lo por experiencia un interupcion di coriente temporal y planea, e tecniconan di ELMAR a keda riba stand by.

Pronostico di temperaturanan halto
 Na luna di juni tambe Meteo Aruba a informa cu nan tabata pronostica temperatura di 34°C-35°C y den luganan urbano kisas un poco mas halto. Esaki a pone cu heat index lo ta halto tambe entre 36°C y 40°C y por causa molester pa hende y specialmente hende grandi lo cual ta trece como resultado mas uso di fam of airco den casnan.

For di luna di mei ya caba diferente medionan di comunicacion internacional ta batiendo alarma pa un ola di calor cu tabata tumando luga den area di Caribe caminda e sensacion di calor por a yega hasta 50 grado loke por resulta peligroso pa personanan cu ta traha of haci actividadnan den aire liber.

Investigando riba internet a logra haya datonan cu ta indica cu entre 1999 y 2019, mas di 150.000 morto rond mundo tabata relaciona cu ola di calor cada aña, segun un estudio reciente publica na PLOS Medicine di Yuming Guo di Universidad di Monash, Australia, y su ekipo.

Durante temporada calido for di aña 1990 te cu 2019, exceso di fayecidonan relaciona cu ola di calor a representa 153.078 morto pa aña, un total di 236 morto pa cada dies biyon habitante of e 1% di e mortonan mundial.