Manera ta conoci dialuna 1 di juli a drenta na vigor oficialmente e cobransa di sustainability fee di 20 dollar na turista. Esaki ta ser cobra a traves di nan aplicacion di ED-Card prome cu nan drenta Aruba, pero segun comentario di turistanan riba rednan social, esaki no ta e caso.
E sustainability fee aki ta algo cu gobierno a implementa como parti di e solucion pa yuda repara y mantene e planta di RWZI. E cobransa aki a drenta na vigor hunto cu e ley di privatisacion di RWZI cu a pasa over pa Utilities Aruba NV cu ta bay haci inversionnan a traves di un compania nobo cu nan incorpora pa esaki, Aruba Wastewater Sustainable Solutions (AWSS).
E ley a drenta na vigor, pero e cobransa di e sustainability fee di 20 dollar aparentemente ainda no. Ariba rednan social por a tuma nota di turistanan cu tabata indica cu nan a haya nan ED-Card pa drenta Aruba pero na ningun momento mester a paga ningun fee di 20 dollar.
Pa e motibo aki hopi ta cuestiona si e cobransa ta legitimo, si e ta valido of si ta un scam mirando cu dia 1 di juli a yega y nada no a sucede pa loke ta e cobransa di e sustainability fee aki.
Bon Dia Aruba a tuma contacto cu Aruba Tourism Autorithy (ATA) pa puntra tocante e sustainability fee y representante di ATA a indica cu Utilities Aruba NV ta bira e costumer service pa esaki.
A tuma contacto cu Utilities Aruba NV pa puntra kico ta e motibo cu ainda no a cuminsa cobra e turistanan e sustainability, aunke e ley a drenta na vigor, pero te na momento di ciere di edicion no a logra haya un contesta.
Hopi a critica pakico ta e turistanan ta esunnan cu tin cu paga pa por drecha e situacion di RWZI, pakico no ta cobra e hotelnan mes pa esaki. Durante un conferencia di prensa na comienso di luna di juni, prome minister Evelyn Wever-Croes a splica e motibo pakico nan a haciele di e manera aki.
El splica cu nan a papia cu e hotelnan tocante esaki, pero hotelnan mes no tabata kier. Inicialmente e ley cu a ser entrega na parlamento tabatin otro financiamento y e financiamento ey tabata pa aumenta e environmental levy, e belasting cu turistanan ta paga na hotel pa medio ambiente.
Pero esey, el a indica, no a conta cu sosten y a haya hopi critica. El a resalta cu mirando e urgencia y e aceptacion mas grandi, specialmente den e sector turistico, cu nan ta convenci cu un cobransa di 20 dollar a traves di e ED-Card 20 ta mas aceptabel pa turistanan paga na luga di un aumento den e environmnetal levy riba e camber di hotel.
Turistanan ta bin Aruba y ta spera un servicio di cinco strea, un isla feliz y limpi, pero e situacion na Aruba den algun contexto ta laga di desea. E turistanan ta bin y ta encontra nan mes cu un isla cu un problema di sushedad, servicio limita, pa motibo di escasez di personal den e sector horeca y aworaki nan tin cu paga otro impuesto tambe, pero kico nan ta ricibi a cambio?
