Ayera 1 di juli a tuma luga Conmemoracion di 161 aña Abolicion di Sclavitud den Reino Hulandes. En conexion cu esaki, minister di Enseñansa, Cultura y Ciencia Hulandes, Robbert Dijkgraaf, a duna un discurso den nomber di gobierno Hulandes, riba e ultimo dia di trabou di gabinete di Mark Rutte.

“Na bispo di e conmemoracion aki, e palabranan a bolbe habri heridanan. Mi a wak bo malestar, mi a scucha bo preocupacionnan, mi a sinti bo dolor. Ban tuma balor di un conmemoracion digno y comparti. Y den e comprension di te na unda nos a yega,” Dijkgraaf a expresa.

El e resalta e ultimo aña di conmemoracion cu a caba di pasa caminda ciudad-, institucion- y famianan a trece dilanti nan historia di sclavitud di nan mes. E historia di sclavitud tabata e centro di atencion na diferente luga y a traves di diferente medio.

El a resalta tambe cu mas hende cu nunca ta traha activamente pa e meta aki y ta determina pa sigui cu e trabou aki. El a remarca cu como minister coordinador di e Aña di Conmemoracion, a traves di combersacionnan cu esnan afecta pa e pasado di sclavitud, el a realisa con tiki conocemento tin tocante e topico aki.

“E hopi combersacionnan a habri mi wowo. Mi a pensa cu mi sa tur cos caba, pero mi mester a siña cu mi conocemento tabata unilateral y cu mi bubble tabata chikito. Cu racismo y discriminacion tin raiz profundo y ta extende hancho den e tempo di awor y cuanto desigualdad ta bin for di esaki tur dia,” el a destaca.

Minister Dijkgraaf a indica cu e historia di e comunidadnan indigena cu a wordo despacha for di nan tera y wordo poni den sclavitud, e violencia inhumano di e siglo di sclavitud, den tur direccion y e resistencia contra esaki, e huida balente, e inhusticia di trabou di contract, pero tambe e repercusionnan di e pasado aki den e tempo di awor, cu hopi tin un bista tan incompleto di dje, ta capitulonan cu ta valioso pa wordo conta y scucha.

El a remarca cu bidanan di hende y comunidadnan completo a ser elimina conscientemente for di historia, pero asina mes esunnan mas fragil y personal a sobrevivi historia.

“E cantica cu un mama ta canta pa pone su yiu sosega. E receta cu ta pasa di generacion pa generacion. E estilo di cabey cu ta papia su propio idioma. Tur e chispanan nunca a paga. E forsa sauve y fragil a demostra di ta hopi fuerte pasobra hende ta carga nan den nan curason, unda otro no por a yega. Nan a transmiti nan cultura. Regalonan stima manera ritual, idioma y historianan di famia. For di e hilonan nan a traha un cabuya di resistencia cu no por kibra y tur dia bo ta haci e cabuya aki un tiki mas largo,” el a destaca.

Minister Dijkgraaf a subraya cu sin e resistencia di e esunnan den presente y nan antepasadonan, sin e persistencia di maestro-, investigador- y activistanan y hopi otro, e Aña di Conmemoracion y e disculpanan di minister president Rutte y e Rey no lo a yega.

El a agrega cu e disculpanan a tuma mas di un siglo y mey pa yega, door di cual ta totalmente comprendibel cu no tur descendiente ta cla pa acepta e disculpanan aki.

“Emancipacion berdadero ta nifica cu bo opinion, bo indignacion, bo yamada pa igualdad no tin otro regla cu esunnan di otro hende. Cu bo por tuma espacio den e sociedad di mesun manera cu tur otro. Emancipacion ta no mas cu restauracion di inhusticia historico. Esey ta un gran tarea, pa tur hende den e sociedad. Tambe pa e siguiente gabinete y tur e gabinetenan despues di dje,” el a destaca.

Minister Dijkgraaf a indica cu nan ta dunando paso tambe den e proceso di restauracion. El a splica cu descendientenan na Hulanda Europeo y Caribe Hulandes cu ta carga e dolor di un pasado di plantacion den nan fam, lo por cambia nan fam di awor pa dilanti y cu e idioma Papiamento tambe tin un status proteha den e parti Europeo di Hulanda.

El a sigui splica cu lo tin un Comite di Conmemoracion Permanente pa e Pasado di Sclavitud y lo tin un Museo Nacional di Sclavitud. El a indica cu tin placa disponibel pa mas investigacion y educacion pa e historia completo por wordo conta.

“E caminda pa dilanti ta largo y yen di obstaculo. Bientonan den contra lo yega, pero nos pasonan ta ireversibel manera e disculpanan ta ireversibel. Nan a cambia e realidad. Nos a duna un comienso. Manera nos ta hunto awe, nos ta carga e pasado den nos. E dolor di e pasado no ta distribui igual, pero tur hende ta heredele di e pasado y antepasado di e futuro,” el a expresa.

Manera ta conoci na december di 2022 gobierno Hulandes y minister president Hulandes e tempo ey, Mark Rutte, a ofrece disculpanan oficial pa Hulanda su envolvimento den sclavitud. El a enfatisa durante su discurso di disculpa cu e ta consciente di e responsabilidad gubernamental di Estado Hulandes den su forma historico, y pa esaki el a ofrece su disculpa pa e papel di Hulanda den e envolvimento historico di su antecesornan gubernamental den permiti, facilita, promove, perpetua y beneficia di e negoshi di sclavitud.

Pa inicia e reparacion e tempo ey, nan a ofrece un pakete integral di medida cu a inclui entre otro stimulacion di conocemento, conscientisacion, reconocemento, conmemoracion y miho comprension di e efectonan cu sclavitud tin te dia di awe. Banda di esaki e gabinete lo a traha riba oportunidad igual y combati racismo y discriminacion.

Aunke na Aruba e sclavitud tabata menos intenso compara cu otro paisnan, esey ta enfatisa mas e crueldad di esnan cu a sclavisa e persona.

Gobierno Hulandes a colabora hunto cu Aruba pa haci realidad e digitalisacion di e archivo nacional pa asina mehora e accesibilidad na documentonan cu ta yuda tur persona cu ta interesa pa sa mas di nan pasado yega na e informacion necesario.