Trahadonan di Arubus: “E situacion financiero por ta malo pero no ta pa via di e trahadonan”

Pa un periodo di dos ora, ayera mainta trahadonan di Arubus N.V a dicidi di pone nan trabao plat pa motibo cu for di basta tempo nan ta bin luchando pa un ahuste salarial nobo. Sinembargo, director di e compania den un declaracion pa Bon Dia Aruba, a señala cu na e momentonan aki esey no ta posibel.

Pa esaki, Roque Tromp ken ta fungi como shop steward di Sindicato di Empleadonan Publico y Priva di Aruba (SEPPA) a declara na diferente medio cu for di 2017 nan ta bringando pa un structura salarial nobo pero no por a yega na un acuerdo. “Gerencia kier impone un structura salarial nobo cual no ta aceptabel pa trahadonan ainda y p’esey nos ta bringando akinan. Nos a sali pafo pa demostra nos mal contento cu esaki.”

Ademas el a bisa cu na 2020 y 2021 tempo di pandemia Gobierno “a hinca man den tur cartera di trahado” den cual a kita e suma di 12.6% igual cu tur funcionario publico y algun trahado priva. “Tur a entrega y nos tur a entrega tambe y aworaki cu nos ta mirando pafo cu otro camindanan si ta hayando 11.7% di indexering y anos di Arubus no ta hayando nada,” el a bisa.

El a trece dilanti cu nan ta dialogando tanto cu minister di Transporte, Ursell Arends y cu mediador di Gobierno na unda cada biaha cu tin reunion, “diripiente nan no ta presenta pa bin duna nos cara y sinta na mesa pa nos por yega na un solucion. Anto e ora ey no ta keda nos nada otro pa sali pafo pa mustra nos mal contento y cu nos kier yega na un solucion. Tur loke nos ta purbando ta di haya ta un trato igual. Mescos cu e tempo ey bo a hinca man den mi cartera, bin duna mi tambe loke mi merece di haya,” Tromp a afirma.

Pa Roque e mal situacion financiero di Arubus ta un historia cu semper ta bin dilanti for di basta tempo. “Pero e ta un situacion con cu bay bin e mester ser drecha, pasobra e situacion por ta malo pero no ta pa via di e trahadonan. E trahado si ta esun cu ta afecta y sufri pa motibo di e situacion malo cu otronan ta ocasionando, por ehemplo loke gerencia ta creando cu mal maneho y decisionnan descabeya, anos ta pagando e prijs. P’esey nos no por keda carga cu e lucha aki mas.”

Di su parti, Edmundo Marlin ken ta fungi como secretario di SEPPA a bisa cu trahadonan tin basta tempo den e lucha aki y awor a bisa “Ta basta.” Pa nan ta inaceptabel cu tin reunionnan unda mediador di Gobierno ta envolvi pero door di esey, e reunionnan ta ser cancela.

“No por ta asina cu na ultimo ora cu e reunion ta ser yama, e reunion ta ser cancela. Nos tin hopi tempo luchando pa bin cu un structura salarial nobo pa e trahadonan di Arubus y nos no ta para. Tanten cu nos no lo keda cla cu esaki, ta bon pa mediador y gerencia compronde cu nos kier sinta na mesa y cab’i regla e asunto aki.”

Edwin Mohamed: “Sin inyeccion di Gobierno, nos no por haci nada”
Bon Dia Aruba a bay busca e otro band’i medaya, unda director di Arubus N.V., Edwin Mohamed a declara cu nan ta sintando na mesa. “Contrario na loke ta ser bisa nos a sinta hopi na mesa, e grupo di shop steward a sinta cu minister na mesa y sindicato cu ta representando e trahadonan cu ta SEPPA, cual tin e mesun problematica cu otro compania estatal unda tambe a ser bisa cu no tin placa. Compania Arubus a firma un Service Level Agreement cu Gobierno, pero akiden no tin espacio pa aumento salarial. No ta manera cu gerencia no kier duna nan sino cu gerencia no tin’e y esey nan ta bon na altura di dje y den reunion cu mediador e director financiero a splica nan mas cu cuatro biaha y tambe a bay na minister cu a splica diferente situacion. Pero e situacion no ta mucho bunita y no tin mucho espacio di parti di Gobierno tampoco,” el a sigura.

Mohamed a splica cu a base di un protocol na aña 2019 nan a traha un salaris schalering nobo y nan a acopla tur e funcionnan, algo cu no tabata existi segun el a afirma.

“Nunca niun trahado tabatin un functie beschrijving cu ta mara na un schaal, ta trabaonan cu ta biniendo tumando luga. Prome cu esey no tabata existi y e cosnan aki a bay hopi for di man door cu no tabatin un structura. Awe Arubus su hendenan ta para pafo pasobra nan tin e custumber di antes, unda nan tabata ser promovi sin cualkier documento of rekisito,” Mohamed a comenta.

E ta bisa cu ta hopi trabao locual nan ta bin haciendo for di 2019 te cu awe. Locual cu e trahadonan kier cu ta un aumento “bastante barbaro y grandi cu Arubus no por carga su so, sin inyeccion di Gobierno, nos no por cargele. Y e nocion cu nan no ta ricibiendo nada tampoco no ta cuadra cu realidad. Por ehemplo, for di 2010 nan ta ricibiendo 1,000 florin na final di tur luna di juli y di 2016 padilanti el a bira 1,500, y for di 2012 te cu 2016 tur aña nan a ricibi 2.5% di aumento pa poder di compra. Asina tin mas toelage cu nan ta ricibi.”

Pa Mohamed, mayoria di hende cu a protesta ayera mainta – cu ta chauffeurnan segun el a bisa – “riba nan salario ainda nan ta ricibi 12% di continu dienst toelage cu ta hancra den C.A.O, nan no por bisa cu nan a keda atras. Nos di gerencia ta kere cu e ta hopi husto locual nan ta ricibiendo. Aworaki nos sa cu Gobierno ta aumentando salario di ambtenaar y nos tin un proposicion cu ta saliendo tambe pa Gobierno, pero sin inyeccion di Gobierno, nos no por haci nada. Locual nos a haya ta locual ta pa nos por mantene e compania coriendo. Nos tabatin un incidente cu dak siman pasa y esaki nos ta bin ta poniendo den presupuesto prome cu mi a bin akinan.”

Trahadonan a reanuda nan trabao back 8.30 di mainta y nan a declara cu nan kier sigui dialoga pa yega na un pronto solucion.

Recientemente, minister Arends a sigura cu “Arubus tin un debe fiscal enorme y su situacion ta keda delicado. No obstante tin plannan concreto pa rescata e compania, garantisa servicio y hisa mobilidad.”