Gino Goeloe director di Wit Gele Kruis Aruba (WGK) a splica cu Linda Terpstra na e momentonan aki ta na Aruba pa yuda nan y Casa Cuna pa loke ta trata maneho of protocol pa casonan specifico di mamanan hoben.

E trabou conhunto aki ta existi for di 8 aña caba unda Terpstra ta yudando nan door di e experiencia cu e tin cu Stichting Feir ubica na Hulanda, e ta duna un man na WGK y Casa Cuna cu diferente casonan specifico na Aruba specialmente di mamanan hoben.

Pa lo cual ta referi na e mamanan hoben, Goeloe a sigura cu e casonan a baha lo cual ta un succes pa nan pa motibo cu 20 aña pasa e cifranan pa aña tabata di mas di 200 y aworaki nan tin entre 40 pa 50 mama hoben pa aña, “esey ta algo cu nos mester aplaudi y den e caso aki cu tin Biba Amor na scolnan, un otro proyecto cu ta yuda nos den e parti di educacion sexual na scol pero Linda su experticio ta riba e problemanan di e mamanan aki cu por ta problemanan mental of cu droga y e ta yuda nos aki na WGK y na Casa Cuna cu ta den e caminda ey.”

Stichting Hunto y Respaldo ta haci nan trabou pero segun Goeloe, mayoria di e hobennan cu tin hopi problema, den e caso aki, tambe e experticio di Stichting Fier cu por yuda nan pa canalisa e problemanan mas miho posibel pa por yuda e hobennan.

Elton Semeleer ken ta fungi como voorzitter di bestuur di Stichting Casa Cuna a conta cu Stichting Fier tambe ta trahando cu nan for di 2016 dunando support na e profesionalnan den e cuido di e muchanan y pa e mamanan hoben.

“Nos a cuminsa un proyecto di duna cuido y guia na mamanan hoben den comunidad y aworaki e ta andando, for di comunidad nos ta ricibi señalnan tambe unda nos tin cu keda activo, move y adapta na e necesidadnan nobo cu e grupo vulnerabel aki tin mester y esey ta loke nos ta haciendo tambe.” Semeleer a comenta.

Igualmente el a informa cu nan a cuminsa adapta e cuido pa mamanan hoben na Casa Cuna dunando un programa special pa atende cu e problemanan aki cu nan tin door di introduci un programa di dia cu diferente actividad pa e mamanan hoben y nan famia por haya guia y yudansa den e situacion cu nan ta aden.

Nan ta haciendo esaki cu diferente stakeholders manera WGK pero tambe bao e guia di Terpstra y Stichting Feir.

Semeleer a señala cu casa Cuna ta mas conoci pa e grupo di muchanan for di 0 te cu 6 aña y despues nan ta bay Imeldahof si no logra haya un famia pa nan. Sinembargo, for di 2016 nan tin un ‘teenmoederhuis’ cu cuatro camber pa cuatro mama caminda e mamanan hoben aki den necesidad y den situacion di peliger ta drenta, ta haya cuido 24 ora, mas e yudansa y guia pa nan por bira miembro di comunidad, cuida nan mes y nan mesun yiu.

For di 2004 Terpstra ta comprometi cu situacionnan social relaciona cu violencia na Hulanda dirigi pa hobennan cu ta bira victima di abuso, maltrato of explotacion.