Mon Plaisir Basisschool ta un di e scolnan cu a participa den e proyecto di agroforesteria sintropico. E scol a ricibi su hardin di alimentacion y ya caba ta cosechando e fruto di e trabou cu nan a realisa.
Den fin di siman Mon Plaisir Basisschool a organisa un evento durante cual nan a inaugura nan hardin di alimentacion oficialmente y esaki tabata consisti di un pop-up market. Durante e evento tur persona cu tabata presente por a disfruta di fruta y berdura fresco, koffie, juicenan fresco, arte y mucho mas.
Ademas di esaki tur persona por a cana den e hardin di alimentacion y mira e trabou cu tanto e studiante-, maestro-, mayor- y boluntarionan a y ta realisa pa mantene e hardin di alimentacion.
E proyecto agroforesteria sintropico ta un proyecto unda e scolnan cu a participa a ricibi sosten tanto for di Santa Rosa Aruba y Living Soil Aruba, como tambe for di Gobierno di Aruba pa desaroya un hardin cu ta provee alimentacion y asina inculca e balor pa agricultura den e futuro generacion pa medio di tecnicanan sostenibel.
E ta un proyecto cu ta ser financia pa Ministerio di Naturalesa y ta ser realisa den cooperacion cu Santa Rosa Aruba y Living Soil Aruba pa brinda guia y sosten pa loke ta trata e materialnan pa haci e proyecto aki posibel.
Living Soil Aruba ta encarga cu setup di e proyecto y e manera cu nan setup e proyecto aki ta cu nan ta encarga pa train tur e hendenan cu ta envolvi profundo cu e agroforesteria sintropico y nan ta yuda e scolnan despues tambe ariba con pa implementa esaki den e curriculum di e scol.
Dia 15 di juni e ultimo scol, Colegio Santa Filomena, a ricibi su hardin di alimentacion. Cu plantacion di e hardin di alimentacion di Colegio Santa Filomena ta culmina e prome fase di e proyecto agroforesteria sintropico na scolnan basico pa e aña escolar aki. Mas di 10 scol a participa den e proyecto y a ricibi nan hardin di alimenatacion.
Igual cu Mon Plaisir Basisschool varios otro scol a y ta cosechando nan propio fruta- y berduranan.
Potret: pagina di Facebook Living Soil Aruba.
