Trahadonan di Arubus ta bay pone trabao plat dialuna awor

Trahadonan di Arubus N.V Aruba a anuncia cu dialuna awor 1 di juli nan ta bay pone nan trabao plat pa un periodo di dos ora, precisamente for di 6.30 te cu 8.30 di mainta pa motibonan di inkietud salarial.

Cu un publicacion haci riba rednan social, e compania di transporte estatal a haci e anuncio indicando cu pa un tempo di dos ora nan servicio no ta bay ta disponibel pa asina nan por aborda e inkietudnan cu nan tin relaciona cu nan structura salarial, “servicio regular ta bay ser regula inmediatamente despues.”

E noticia a genera cierto confusion pa comunidad, ta importante pa menciona cu e welga aki ta bay afecta tur ruta di e busnan, sinembargo, nan ta bay sigura di priorisa e rutanan escolar pa nan avansa segun tin planea caba y asina ey muchanan no lo tin problema pa asisti na nan scolnan, segun nan a menciona.

No ta un secreto cu Arubus N.V no ta pasando den su miho momento pa problemanan financiero, dia 12 di juni ultimo e minister encarga cu e cartera di Transporte, Ursell Arends, a informa cu “a reuni cu Raad van Commissarissen di Arubus unda a trece puntonan di preocupacion dilanti y tambe preocupacionnan di e trahadonan cu a bin dilanti durante reunion cu SEPPA siman pasa. Nos tur por ta di acuerdo cu tin hopi reto riba tur nivel, pero alabes espacio pa oportunidadnan pa e compania estatal funciona optimalmente. Arubus tin un debe fiscal enorme y su situacion ta keda delicado. No obstante tin plannan concreto pa rescata e compania, garantisa servicio y hisa mobilidad.”

Tabata november di 2023 ora tambe un otro reunion a tuma luga cu Raad van Commisarissen, Advance HR, SEPPA y trahadonan di Arubus unda a presenta resultado di e structura salarial cu enfoke riba e crecemento di e trahado su carera. E advies a duna di conoce cu tin posibilidad pa camindanan cu e trahado por cana pa sigui crece den su carera na Arubus. Gerencia ta encarga pa e implementacion di e advies.

Sinembargo, ta parce cu ainda tin trabao pa haci, trahadonan mes no ta contento cu e directiva unda nan a mes a señala na december di 2022 cu nan no por a sigui tolera e director mas, e tempo ey nan a haci un otro walkout debi cu nan kier haya solucion pa loke ta trata e salarionan nobo cu compania kier implementa y cu segun a señala pa e trahadonan mes, esey ta husto pa e compania pero no pa e trahadonan.