Meteo Aruba vigilando dos ola tropical cu lo por desaroya y yega region di Caribe

Temporada di horcan ta den full swing y te na e momentonan aki Aruba no a sinti ningun efecto significante ainda, nada mas cu algun yobida aki aya. Recientemente a bira conoci cu Meteo Aruba ta vigilando dos ola tropical cu lo por desaroya den tormenta y cu lo por drenta den e region di Caribe y tin efecto pa Aruba.

Den e Atlantico Tropical Central tin e sistema AL95 cu ta un sistema di presion abao y ta localisa mas o menos 1400 miya na oost-zuidoost di e Isla Windward ta birando mas defini y e yobida y strena cu lamper ta birando mas organisa tambe.

Si e tendencia aki sigui, un depresion tropical lo forma probablemente despues pronto. Ta spera cu e sistema aki ta move west cu un velocidad di 15 pa 20 mph y cu lo pasa cerca di e Isla Windward pa final di e weekend aki. Alerta pa horcan of tormenta tropical por wordo rekeri algun parti di e region.

E ola tropical aki tin 90% di posibilidad di desaroyo y lo yega Caribe den algun dia. No tin exactitud ainda con su trayectoria lo ta.

Den e area di Atlantico Tropical Oriental tin otro ola tropical localisa algun 100 miya na e zuidoost di e Isla Cabo Verde cu ta produci strena cu lamper y awasero desorganisa. Algun desaroyo slow di e sistema aki ta posibel e siman cu ta bini mientras cu e ta move generalmente west cu un velocidad di 15 pa 20 mph a traves di e Atlantico tropical central y occidental. E ola tropical aki tin 20% di posibilidad y tambe ta den desaroyo.

Crisis Management Office ta premira cu e temporada di horcan e aña aki ta bay ta mas activo den region Caribense cu e probabilidad cu mas sistema ta bay drenta Caribe compara cu e añanan anterior cu a keda pafo di Caribe door cu tin efecto di La Niña unda ta pronostica cu lo tin 85% mas actividad di horcan.

Temporada di horcan a cuminsa dia 1 di juni y ta termina oficialmente dia 30 di november. Durante e temporada aki instancianan oficial ta recomenda tur ciudadano pa keda atento pa cualkier alerta cu lo por wordo emiti y pa no drenta den panico si esaki ta e caso. Ta importante tambe pa ciudadanonan ta prepara y tin tur articulo di prome necesidad den cas den caso cu tin un tormenta.