Ayera mainta Dakota tabata di fiesta caminda un di su cayanan awor ta reconoce y dedica na e “dokter di e pobernan,” dokter Venezolano Hose Gregorio Hernandez.

E ta conoci como “e dokter di e pobernan” y for di decadanan atras su siguidonan tanto na Venezuela como rond mundo tabata warda e noticia cu awor Papa Francisco ta bay canonisa e beato pa proximamente ta un santo di Iglesia Universal.

Presidente y fundado di cas di oracion Hose Gregorio Hernandez, Susy Henriquez a señala cu nan ta hopi contento cu esaki ya cu nan mester a cana un caminda largo, busca firmanan, entre otro pa asina awe Dr., Hose Gregorio Hernandez tin su reconocemento bon mereci.

“Awe mi ta hopi contento cu e presencia di prome minister Evelyn Wever-Croes ken ta cerca nos, el a drenta den nos cas di oracion y el a mira kico nos tabata kier y nos a logrel’e, nos a haya 921 firma y nos por a entrega na Sra. Minister.” Henriquez a bisa.

Igualmente el a señala cu aña pasa nan a haci 25 aña cu su persona ta manehando e Cas di Oracion aki y pa cinco aña e ta presidente.

Di su parti, prome minister Evelyn Wever-Croes tabata presente pa desvela e nomber di e caya y a bisa cu nan a cuminsa cu e proceso pa yega na cambio di e nomber, “ora bo ta cambia e nomber di e caya e ta algo grandi, si bo a biba henter bo bida na Patiastraat y un dia b’a lanta mainta y e no ta Patiastraat mas, e ta e nomber di un hende cu nunca bo a tende di dje y bo ta sinti bo bon, b’a biba henter bo bida na Patiastraat, imagina bo e sensacion si algo a cambia di dia pa anochi, berdad tin hopi reto administrativo riba cambio di nomber y esey ta algo cu e comision pa cambio di nomber ta tene hopi cuenta cune , na ken bo ta dedica e caya, si e persona ta na bida, si el a fayece caba, kico el a haci, ma bisa Sra. Susy ban dedica e caya na honor na Dr. Hose Gregorio Hernandez, e caya ta keda oficialmente cu e mesun adres pero e ta dedica na Hose Gregorio Hernandez cu a mi ta pensa ta un dedicatorio sumamente bunita pa lo cual el a haci pero principalmente pa lo cual boso nan kier dedica y pa mustra mundo henter cu Aruba ta aprecia enormemente tur lo cual e dokter a haci,” prome minister a finalisa.

Dr. Hose Gregorio Hernandez ta considera como e impulsor y pionero di docencia cientifico y pedagogico na Venezuela, tambe tin un fase destaca como fisiologo y biologo.

Durante e pandemia di grip na 1918 na Venezuela e tabata bishita hendenan malo na Caracas.

29 di juni 1919 cu 54 aña di edad, Hernandez a fayece di un golpi na su cabes na momento cu a bay crusa un caya y un auto a dale.