Riba dialuna ultimo, 24 di juni, vice-admiral Tas, comandante di Forsanan Naval (C-ZSK) y comandante Hansen, director di Wardacosta Region Caribe, a firma e convenio renoba entre ministerio di Defensa y Wardacosta den Region Caribe.
Ministerio di Defensa den esaki ta keda representa pa C-ZSK. E convenio aki, cu cada tres aña ta keda actualisa, ta regla acuerdo di apoyo y cooperacion mutuo entre ambos organisacion.
E convenio ta prepara pa legalmente registra y facilita e cooperacion entre ministerio di Defensa Hulandes y Wardacosta. E ta describi prestacion di servicionan di apoyo den region Caribe pa diverso dependencia di e Comando di Forsanan Naval y otro componente di Defensa. Tambe ta describi e proceduranan con pa aborda y resolve problemanan di apoyo mutuo.
Aunke Wardacosta ta un organisacion independiente, e ta keda intensivamente sosteni pa Defensa y mira como un parti integral di C-ZSK. Cu frecuencia personal di Defensa ta keda facilita pa funcionnan specifico, y e barco di patruyahe di Defensa, incluso e helicopter abordo, ta keda desplega di forma planifica pa operacionnan di Wardacosta. Di otro banda, Defensa por haci uso di unidadnan di Wardacosta, manera e avion di wardacosta. E operacion aki a resulta specialmente eficaz den e lucha contra transporte di droga riba lama.
E sosten na Wardacosta ta keda suministra specialmente pa Comandante di Forsanan Naval den Region Caribe (C-ZMCARIB). Sede principal di Wardacosta ta estableci na e Base di Marina Parera na Corsou, djis banda di e sede principal di C-ZMCARIB. E funcion di C-ZMCARIB ta keda cumpli pa comandante Hansen, kende tambe ta ocupa e funcion di Director di Wardacosta.
E convenio renoba aki ta reforsa e estrecho cooperacion y cooperacion activo entre Defensa y Wardacosta pa medio di cual seguridad y eficacia di operacionnan den Region Caribe por keda mehora aun mas.
