13 hoben a logra haya certificado di prome fase di Formacion Social SVT 17

Un grupo di 13 hoben di Formacion Social SVT 17 ayera a ricibi nan certificado di e prome parti di loke ta trata e largo proceso di Formacion Social unda hobennan tanto hende homber como hende muhe ta siña loke ta disciplina, balornan y servicio pa comunidad.

Na comienso esaki tabata un grupo mas grandi, pero algun di nan a cay afo pa diferente motibo. Dden total 13 hoben a ricibi nan certificado y asina tambe nan a finalisa e prome parti di e trayecto, manera Jesica Ras, coordinador di e proyecto SVT grupo 17 a splica e dia di ayera.

Ademas el a menciona cu pa algun di esnan cu a dicidi di no continua den e trayecto aki ta pa motibo cu ta algo mucho dificil y pisa. Sinembargo, Ras a comenta cu tambe nan ta haya comentario e dos parti ta mas dificil door cu e studiantenan ta mas riba nan mes cu no tin e mesun guianan cu den prome fase, manera lanta nan for di soño, corda nan cu mester yega trempan, mester bay Kazerne tur diaranson y pa algun di nan esey ta dificil pa loke ta trata e disciplina cu nan tin mester.

“En berdad pa henter e trayecto, mi ta kere cu esun di dos ta esun di mas dificil,” el a bisa.

Den e prome fase e hobennan ta siña mas e parti di disciplina, nan ta traha den ekipo y riba nan mes, nan ta haya guia pa comunica cu otro, con pa traha cu otro persona y compronde e otro su situacion, nan ta haya cursonan pa maneha nan emocionnan pa diferente situacionnan. Y den e di dos fase nan ta haya diferente curso como di Enseñansa pa Empleo, amplia nan conocemento den diferente idioma, esnan cu no tin rijbewijs tambe ta haya rijles y aparte di esey nan ta bay tres biaha pa siman na un compania. “Echt ta un trayecto un tiki largo, pero bo ta siña kico ta un trabao y ta depende con stagiaire periodo ta cay, cu por ta 7 luna of 8 luna pero ta un trabao cu nan tin cu cumpli,” Ras a bisa.

Prome minister Evelyn Wever-Croes a duna un palabranan di pabien na studiantenan aki. “Den e trayecto cu ta sigui, sigui cu e mesun determinacion, cu e mesun empeño y bo lo ta exitoso. Danki pa yuda nos cu un problema cu pa Aruba ta un problema cu nos ta considera importante y boso nan a yena e necesidad cu tabatin na Aruba di un bon forma.”