(AP) — Marcel Sabitzer a anota laat pa Austria pa avansa den etapa di knockout di Campeonato Europeo como ganador di su grupo, den un victoria 3-2 riba Hulanda ayera.
Austria a keda campeon den Grupo D danki na e hecho cu Francia a empata 1-1 cu Polonia den e otro wega. Tanto Francia como Hulanda ya tabata sigura progreso danki na resultadonan di otro weganan.
“Ganador di grupo!” e fanaticonan Austriaco a canta mientras tabata sali di Olympiastadion na Berlin. Nan contrapartinan Hulandes, bisti na oraño vibrante, mester awo warda pa e otro gruponan conclui pa asina mira cua team ta spera nan den proximo ronda.
Austria ta bay enfrenta e segundo lugar den Grupo F – Turkia, Georgia of Republica checo na Leipzig.
E Austriaconan tabatin mester di un punto pa sigura nan avance y tabatin un bon comienso cu delantero Hulandes, Donyell Malen anotando un auto-gol den di seis minuut.
Substituto den prome mita, Xavi Simons a set up Cody Gapko pa empata dos minuut despues di e break, pero Romano Schmid a hiba Austria back dilanti den minuut 59.
Memphis Depay a empata cu un final briyante den minuut 75, maske mester a pasa den un chekeo di VAR ya cu referee Ivan Kruzliak a sinti cu el a mishi e bala. E chekeo a haya cu Depay no a mishi’e.
Pero Sabitzer a restaura e bentaha di Austria dos minuut despues cu un tiro for di un angulo diferente. Esaki a proba di ta e ganador a pesar di un final frenetico cu chens na ambos banda.
Austria a caba cu un racha di shete wega di perdida contra Hulanda, incluyendo un derota den etapa di grupo den ultimo edicion di e torneo. Ayera tabata exactamente 36 aña riba e dia desde cu Hulanda a gana Euro 88 na Munich.
