Ayera ariba red social un biaha mas un publicacion cu ta relaciona cu maltrato di mucha a bira viral. Ta trata di un publicacion di un mama, J. Richardson, cu a denuncia publicamente cu un homber adulto a drenta den klas y a dal su yiu di seis aña.

Segun e mama aki ta indica den su publicacion, tur cos a cuminsa cu un simpel wega di “tikertje” di mucha y a temina cu un homber grandi ta drenta den klas di su yiu y pasele un bofta na su cara.

“Ken por a kere cu den e tempo moderno aki por ta posibel cu un mayor, hende homber di un edad alrededor di 37 aña, por drenta klas di un Kleuterschool y despues di puntra nomber di un mucha di 6 aña….gewoon pasa e juffrouw di klas voorbij, yega para dilanti di e mucha y kaft’e un wanta den su cara casi bent’e for di su stoelĺ y bis’e “otro biaha no mishi cu mi yiu”. Despues cana bay manera nada a pasa,” e mama a splica den su publicacion.

E caso aki a sucede na Scol Preparatorio Kukwisa, unda e mucha ta bay scol. E mama di e criatura a sigui apunta cu esaki ta un trauma psicologico no solamente pa su yiu cu a biba e momento ey, pero tambe pa e otro muchanan di e klas cu a presencia e acto aki tuma luga. El a agrega cu su yiu ta un mucha keto y trankilo.

Por asumi cu un situacion asina ta rekeri di atencion serio y un investigacion, pero segun e mama ta señala, e proceso aki no a cana manera debe ser y no a ricibi e atencion necesario.

“Awor ta bin e parti mas increibel… E cabesante di scol hunto cu e juffrouw y e meneer cu na e momento ey tabata presente den mi yiu su klas, y SKOA a cera cabes hunto y a prefera pa proteha e scol y gewoon a purba stroba e investigacion di polis birando yen storia y pa nada nan kier a divulga te na e momento aki na mi persona e nomber di e burdugu cobarde di marca mayor,” e mama a subraya.

El a sigui splica cu di otro banda e cabesante di e kleuterschool ta menasando su persona cu e mester hiba su yiu scol, obligacion di leerplicht, e siguiente dia y haci manera cu nada no a pasa sin tene consideracion cu e trauma cu e mucha a experiencia.

“Mi yiu ta bula lanta for di soño dos pa tres biaha marduga, e tin miedo di hende, miedo di ta cerca y papia cu hende…. Y en bes di puntra si mi yiu ta bon si mester algun ayudo mi ta wordo obliga pa mi hib’e scol… Mi ta haya cu e nivel di profesionalismo di nos enseñansa aki a laga hooopi di desea y e manera cu esaki a ser atendi for di e principio di e sucedido ta hopi desapunta… Pasobra niun hende a tene cuenta cu e trauma psicologico cu mi yiu ta pasando aden. E miedo di hasta acerca e porta di Kukwisa Kleuterschool cu a keda den dje. Mi ta imagina cu tin mas mucha di su klas lo a keda afecta na un nivel of otro di e mesun incidente cruel aki pensa cu ken cu ta por drenta klas y dal bo pa hunga cu otro,” el a remarca.

E mama di e mucha ta resalta cu e persona responsabel, E. Sint Jago, keto bay ta cana rond manera “un gran heroe” cual e ta señala ta danki, den gran parti, na e cooperacion di Kukwisa Kleuterschool y SKOA cu a keda nenga di duna e informacion detaya na polis.

“E cabesante di scol cu a scoge pa proteha e nomber di su scol ariba e abuso di mucha cu a tuma lugar na su scol y sin yama polis na e momento di e sucedido, mi no lo bay pone su nomber pero tur hende por sa facilmente ta ken e ta… Mi ta confia cu husticia lo prevalece pronto riba tur esaki,” el a finalisa.

E publicacion aki a bira viral ariba Facebook y hopi ciudadano a expresa nan rabia, malcontento y frustracion. Hopi ta cuestiona ta con algo asina por a tuma luga, con un mayor por a djis drenta den klas sin cu a wordo para pa ningun staff of personal di e scol pa cuestiona e motibo pakico e persona, un mayor, tabata riba tereno di scol durante orario di scol.

Hopi ciudadano a reacciona den e seccion di comentario y ta conseha e mama pa e mes cana su caminda, haci un denuncia contra e homber y no warda riba e scol no SKOA pa nan investigacion.

Bon Dia Aruba a tuma contacto cu directora di SKOA, sra. Anuesca Baly, y a manda algun pregunta pe pa loke ta e caso lamentable aki. A puntra Baly kico su reaccion ta tocante e acusacionnan cu e mama aki a haci, si e informacion cu e mama a publica, indicando cu SKOA a cera cabes cu e kleuterschool pa e proteha e scol y cu a stroba e investigacion door di no duna informacion detaya, ta corecto y kico ta e medidanan cu SKOA a tuma den e caso aki.

Bon Dia Aruba no a ricibi contesta for di Sra. Baly prome cu e ciere di e edicion.