Algun tempo atras Parlamento di Aruba a ricibi e Nota di Comienso di Aña 2024 y hunto cune e prome Presupuesto Complementario pa aña 2024 cu ta contene e cambionan den maneho cu ta rekeri aprobacion di Parlamento.
Un di e cambionan cu ta resalta ta e entrada extra cu a wordo realisa debi na e mehoracion di cumplimento di pago di belasting y crecemento economico. Minister di Finanzas, Xiomara Maduro ta informa cu entrada extra aki den Presupuesto 2024 lo wordo destina pa mehora e poder di compra di varios grupo den comunidad.
Indexering
Ta conoci cu Gobierno a yega na un acuerdo cu sindicatonan pa indexa e salario di e empleado publico pa mehora nan poder di compra. Un parti di e indexering lo tuma luga den luna di juli 2024 y p’esey den e prome Presupuesto Complementario 2024 ta aloca fondo pa e indexering aki.
Reparatietoeslag
Den e Presupuesto Complementario tambe ta aloca fondo pa asina por brinda trahadornan cu ta gana menos di 2500 florin y e pensionadonan di SVB un subida di e reparatietoeslag.
Bijstand
Pa mehora e poder di compra di esnan mas vulnerabel den comunidad, den e Presupuesto Complementario tambe ta aloca fondo pa asina por hisa e suma di bijstand pa esnan cu un limitacion.
Trahadornan di Fundacion subsidia
Pa e trahadornan cu ta traha na Fundacionnan cu ta haya subsidio di Gobierno, den Presupuesto Complementario lo pone fondo pa e Fundacionnan aki por ahusta e salario di nan trahadornan pa mehora nan poder di compra. E Fundacion subsidia pa Gobierno lo mester haci un peticion apart pa e fondo extra y esaki lo wordo duna bou e condicion cu e fondo por wordo uza solamente pa gasto di salario y no pa otro gasto di e fundacion.
Aprobacion di Parlamento
Minister Maduro ta spera cu Parlamento por aproba e prome Presupuesto Complementario pa aña 2024 pa asina varios grupo den comunidad por keda yuda cu nan poder di compra.
