Ayera mainta durante un conferencia di prensa di gobierno minister di Labor, Energia y Integridad, Glenbert Croes a reacciona ariba e conclusionnan di e rapport TNO tocante e proceso di transicion energetico na e Aruba.
E mandatario a remarca cu e no ta di acuerdo cu e conclusionnan di e rapport y a resalta cu e caminda cu gobeirno ta canando pa loke ta e proceso di transicion energetico na Aruba, nan ta haciendo esaki riba nan mes y no man den man cu TNO.
“Nos no ta canando man den man cu TNO. Nos ta haciendo full e proceso di transicion energetico, e trayecto di descarbonisacion di economia, nos ta canando e caminda aki riba nos mes. Mi mester bisa respetuosamente cu nos ta den total desacuerdo cu conclusion y opinionnan di TNO,” el a subraya.
Na mesun momento minister Croes a extende un invitacion pa e organisacion bin Aruba pa nan reuni cu WEB, ELMAR, Utilities, RdA y tur stakeholders cu ta involucra den e proceso di transicion energetico pa nan por scucha Aruba su posicion y vision, y pa nan por verifica esaki for di e team di WEB, ELMAR, Utilities, RdA y di cualkier otro stakeholders na Aruba involucra den e proceso aki.
El a remarca cu e noticia y e conclusionnan di e rapport aki a asombra gobierno hopi. El a splica cu tabatin entidadnan di gobierno pa cual TNO lo a manda nan conclusionnan preliminar riba e tema en cuestion y TNO lo mester a permiti e entidadnan aki duna nan un reaccion prome cu nan emiti un conlcusion final. Esey no tabata e caso y pa e motibo ey, el a indica, e ta extende su invitacion pa TNO bin Aruba pa asina evita polemica.
E mandatario a trece dilanti e punto di molinanan di biento, mencionando tambe e critica cu lider di partido AVP, Mike Eman, a expresa tocante gobierno den su reaccion ariba e mesun rapport aki.
El a splica cu e parke di molina di biento na Vader Piet ta gobierno di MEP a realis’e, cual a hiba na e inicio di e proceso di transicion energetico. El a sigui splica cu e zona di Rincon ta ideal pa desaroya e siguiente expansion di e parke di molina di biento pa genera electricidad pa WEB y via WEB e ta bay ELMAR.
E mandatario a agrega cu tambe tin posibilidad pa un “offshore” parke di molina di biento. Tin un zona designa entre Aruba y Venezuela cu ta un zona cu tin un potencial pa desaroya un parke di molina eynan di casi 320MW.
