(AP)—Prome minister Israeli Benjamin Netanyahu a bisa cu e lo solamente acepta un trato parcial pa un alto el fuego cu no lo trece un fin na e guera di ocho luna caba andando na Gaza, proyectando duda riba e viabilidad di un propuesta pa tregua apoya pa Merca.
Netanyahu a bisa cu e ta cla pa haci un trato parcial pa trece algun di e 120 rehennan ainda wanta pa Hamas na Gaza, pero “nos ta determina pa sigui e guera despues di e pausa, pa asina completa e meta di elimina Hamas.”
Su comentario diadomingo ta bin durante un tempo sensitivo mientras Israel y Hamas ta parce di ta moviendo mas leu for di otro tocante con e trato di alto el fuego lo bay, y mientras lidernan Israeli ta keda señala cu un guera cu e grupo militante Libanes, Hezbollah, por sosode pronto.
E plan di tres fase pa un truega na Gaza lo trece cune e libertad di e resto di rehennan wanta den un intercambio pa centenares di Palestino encarcela pa Israel. Hamas ta insisti cu e no lo libera e resto di rehennan tambe cu no tin un alto el fuego y un retiro completo di forsanan Israel for di Gaza.
Israel a lansa e guera despues cu Hamas a lansa un atake riba Israel dia 7 di october 2023, den cual militantenan a drenta e parti sur di Israel y a mata aproximadamente 1,200 hende—mayoria di nan ciudadano—y a secuestra aproximadamente 250.
Desde e tempo ey, Israel su ofensivo- y bombardeonan a mata mas cu 37,600 hende na Gaza, segun e ministerio di Salud den e teritorio, cual no ta distingui entre combatante y ciudadano den nan conteo.
Critico internacional ta sigui crece tocante e campaña di guera di Israel mirando cu Palestinonan ta enfrenta hambruna severo. E guera a recorta un entrada di cuminda, medicina y productonan basico pa Gaza, cual awo ta depende totalmente riba ayudo for di exterior. E corte mas halto di e Organisacion di Nacionnan Uni (ONU) a conclui cu tin un “posible riesgo di genocidio” na Gaza—un carga cu Israel a nenga fuertemente.
