Riba 21 di juni 2024, Conseho di Minister di Reino a bay di acuerdo cu e nombramento di señor drs. Marion Agunbero como miembro di Colegio di supervision financiero di Aruba (CAft) riba proposicion di Aruba. Señor Agunbero ta sucede señora mr. dr. Hellen van der Wal entrante prome di augustus 2024.
Marion Agunbero tin amplio formacion y experencia financiero. Den e periodo di juni 2013 pa juli 2024, e tabata miembro di Raad van Advies di Aruba, y for di november 2019 te cu mei 2024, e tambe tabata director di Stichting Pensioenfonds Tourism Sector Aruba. Den e periodo di 1986 pa 2019 e tabata entre otro director di Direccion di Finanzas y el a desempeña varios funcion di management cerca Banco Central di Aruba y Caribbean Mercantile Bank N.V. Danki na su conocementonan y experencia amplio, Marion Agunbero sigur lo ta di gran balor pa CAft. El a obtene su bachelor den Business Administration and Public Administration di Universiteit van de Nederlandse Antillen, y su master den Public Administration di Erasmus Universiteit Rotterdam.
Presidente Lidewijde Ongering: “Mi kier a expresa mi aprecio pa e contribucion cu miembro saliente Hellen van der Wal a aporta e añanan pasa na CAft. Ta alegra mi cu Marion Agunbero ta dispuesto pa sigui cu su tareanan. Cu señor Agunbero na bordo, CAft ta gana un miembro cu hopi experencia financiero. Mi ta ilusiona pa inicia nos colaboracion.”
Marion Agunbero: “Ami tambe ta ilusiona pa por cuminsa cerca CAft, y duna mi aporte na e mehora di e durabilidad di finanzas gubernamental di Aruba.”
Potret: Entrante prome di augustus, drs. Marion Agunbero ta bira miembro di Colegio di supervision financiero di Aruba.
