Recientemente, CBS a publica e Indice di Prijs di Consumo pa luna di mei 2024. Den esaki, a destaca cu e bestaansminimum pa un famia a aumenta cu Afl. 138. Igualmente, prijs di gasolin, vivienda y cuminda a registra un aumento.

Bestaansminimum na Mei 2024

E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”.

Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0- 15 aña). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).

Na Mei 2024 e bestaansminimum mensual pa un hogar cu ta consisti di dos (2) adulto y dos (2) mucha (edad 0-15 aña) (Afl. 5,492) ta mustra un subida di Afl. 138 compara cu Mei 2023 (Afl. 5,354) y a wordo causa principalmente door di subidanan di Afl. 54 den e sectornan di “Cuminda y bebida no-alcoholico” y “Vivienda”.

Na Mei 2024 e bestaansminimum mensual pa un hogar cu ta consisti di un solo adulto ta Afl. 2,615, cual ta representa un deficit di entrada di Afl 629, un caida di Afl. 28 compara cu e deficit observa un aña pasa (Afl. 657). E deficit aki ta e di dos mas halto registra den un periodo di seis (6) aña pa luna di Mei.

Cambio di prijs di petroleo, utilidad, gasolin y diesel na Mei 2024

Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na Mei 2024 e prijs promedio pa bari di petroleo (US$ 80.41) a conoce un caida di US$ 5.09 (-6.0%) compara cu April 2024 (US$ 85.50).

Prijs di electricidad y di awa no a cambia compara cu April 2024. Consecuentemente, e prijs promedio di electricidad pa vivienda a keda Afl. 274.57, mientras cu e prijs promedio di awa pa vivienda a keda Afl. 168.73.

Prijs di gasolin a registra un subida di Afl. 2.10 cent (0.8%) na Mei 2024 y a causa un efecto di 0.04 ppt riba e CPI. Prijs di diesel a registra un caida di Afl. 1.90 cent (-0.8%) na Mei 2024 y a causa un efecto insignificante riba e CPI. Na Mei 2024, utilidad, gasolin y diesel como grupo, tawata tin un subida di prijs di 0.2% compara cu April 2024 y hunto tawata tin un influencia di 0.04 ppt riba e CPI, mientras cu e restante 404 bienes y servicio hunto, a conoce un caida di prijs di 0.1% y tawata tin efecto un efecto di -0.07 ppt riba e CPI.

Cambio di prijs di Cuminda y servicio di catering na Mei 2024

E indice di “Cuminda & servicio di catering” a registra un subida di 0.3% na Mei 2024, despues di a registra un subida di 0.3% tambe na April 2024.

E indice di “Cuminda na cas” (0.1%) a registra un subida, unda cuatro (4) di e diesun (11) indicenan di e gruponan di cuminda na cas a subi na Mei 2024.

E indice di “Fruta” a conoce e subida di mas grandi (1.6%) na Mei 2024.

Otro subidanan significante a wordo registra den e indicenan di “Berdura” (0.5%) y “Carni” (0.5%).

E caida mas grandi a wordo registra den e indice di “Batata, yuca y batata dushi” (-3.5%) na Mei 2024. E indice di “Cuminda pafo di cas” a registra un subida di 0.8% na Mei 2024. Na Mei 2024, “Cuminda na cas” y “Cuminda pafo di cas” como grupo, tawata tin un subida di prijs di 0.3% compara cu April 2024 y hunto tawata tin un influencia di 0.05 ppt riba e CPI, mientras cu e restante bienes y servicio hunto a experencia un caida di prijs di 0.1% y tawata tin un efecto di -0.08 ppt riba e CPI.