Paws United Aruba ta un campaña nobo cu ta enfoca den sterilisa e mascotanan den diferente bario di Aruba organisa pa 11 fundacion hunto cu veterinario y Stimami Sterilisami ken a uni pa soluciona e problema cu ta existi di cachonan riba caya.
Fin di siman ultimo, nan a bay den bario di Madiki caminda nan a informa cu nan a papia cu diferente doño di mascotanan ken a duna nan un calido bonbini hasta cu un di e miembronan a haya un cacho cu mester a hib’e te veterinario debi na un malesa y debilidad pero lamentablemente, nan mester a lag’e bay. “Un cos ta sigur cu Madiki tin hopi cacho” un publicacion riba nan rednan social a bisa.
Nan a señala cu nan lo bolbe Madiki ya cu e situacion aki no por ser ignora y nan lo sigui recore otro barionan pa conoce un tiki mas con esaki ta.
Zoey Conijn di Luna Foundation den un entrevista reciente pa Bon Dia Aruba a splica cu e idea no ta bay pa e cantidad si no riba calidad, esaki ta nifica cu nan no ta enfoca riba cuanto bario nan por haci den un corto periodo di tempo, e campaña ta keda den e bario ey te ora cu nan ta sigur cu tur mascota a ser opera y cu nan ta sigur na nan cas.
E fundacionnan ta drenta den e bario, den e casnan pa opera e mascotanan y nan ta drenta pa papia cu e doñonan, educa nan y pa traha casnan di cacho unda mester, zorg pa e cacho ta bon mara y zorg pa e pushinan no ta den sushedad.
“E ta full un proyecto pa ora nos sali di e bario ey, e bario ey ta haya e stempel cu tur mascota eyden ta sigur, ta okay, ta opera y ta bon cuida,” Conijn a enfatisa. Despues cu nan ta sigur cu e mascotanan ta sigur y opera, nan ta bay den otro bario pero “ora nos drenta Madiki nos por wak ki ta pasando, cuanto tempo lo mester y nos ta tuma nos tempo,” el a agrega.
E obhetivo di e campaña di Paws United Aruba segun Conijn a conta, ta pa Aruba mes resolve e problema cu tin di cachonan, pa bay den e barionan y splica e doñonan ariba e cuido di mascota.
