(AP)—E ultimo biaha cu e prome minister Israeli, Benjamin Netanyahu, a adresa e Congreso Mericano, casi 60 democrata no a presenta na su discurso nuebe aña pasa, yamando e un insulto contra ex-presidente Barack Obama mientras el a negocia un trato nuclear cu Iran.
Cu Netanyahu plania pa adresa legisladornan Mericano dia 24 di juli y su gobierno awo den guera cu Hamas na Gaza, e cantidad di ausencianan por ta mas grandi. E democratanan congresional ta bringando cu e idea si nan asisti of no. Hopi ta den conflicto cu e nan apoyo pa Israel y nan angustia cu e manera con Israel a conduci operacionnan militar na Gaza. Mas cu 37,000 Palestino a ser asesina pa fuego Israeli desde e atake di Hamas dia 7 october 2023 cu a causa e guera, segun e ministerio di Salud den teritorio di Hamas.
Mientras cu algun democrato ta bisando cu nan lo asisti for di respet pa Israel, un fraccion grandi y creciente no kier ningun parti den dje, creando un atmosfera extraordinariamente tenso na un reunion cu normalmente ta un muestra ceremonial y bipartisano di apoyo pa un aliado Mericano.
Tension entre Netanyahu y presidente democratico Joe Biden a cuminsa mustra den wowo di e pueblo, cu Netayahu acusando e administracion di Biden siman pasa cu nan ta reteniendo armanan Mericano for di Israel—un declaracion cu el a haci atrobe ayera na su gabinete. Merca a rechasa e acusacion aki, bisando cu nan “no sa di kico e ta papia. Nos echt no sa.”
E invitacion for di House Speaker Mike Johnson pa Netanyahu a bin despues di consulta cu e White House, segun un persona anonimo familiar cu a asunto. Te awo, no a plania ningun reunion entre e lidernan durante Netanyahu su bishita na Washington, e persona aki a bisa.
Netanyahu a bisa den un comunicado cu e tabata “hopi emociona” pa e invitacion pa adresa Congreso y e chens “pa presenta e berdad tocante nos guera husto contra esnan cu ta busca pa destrui nos na e representantenan di e pueblo Mericano y henter mundo.”
Republicanonan a presenta e idea di invita Netanyahu inicialmente na maart despues cu senador Chuck Schumer, e oficial mas halto Hudiu na Merca, a duna un discurso riba e piso di Senado cu tabata hopi critico di e prome minister. Schumer a yama e lider di Israel “un obstaculo di paz” y a urgi pa un eleccion nobo na Israel, hasta mientras el a denuncia Hamas y a critica e presidente di Autoridad Palestino Mahmoud Abbas.
Republicanonan a denuncia e discurso como un insulto pa Israel y su soberania. Johnson a menciona puntrando Netanyahu pa bin Washington, un invitacion cu Schumer y e lider democratico di e House, Hakeem Jeffries di New York, ultimamente a promove, aunke dudosamente.
Representante Michael McCaul, presidente di e House Foreign Affairs Commitee, a bisa cu e lo ta “saludable” pa miembronan di ambos partido asisti na e adres. “Mi ta pensa cu hopi Mericano ta hayando un banda di e narativo, specialmente e generacion mas jong, y mi ta kere ta importante pa nan tende for di e prome minister di Israel, pa loke ta su perspectiva,” segun McCaul.
Entrevistanan cu mas di un decenas di democratanan a revela e extento di desatisfaccion tocante e adres binidero, cual hopi ta sinti ta un plan republicano pa dividi nan partido. Algun democrata ta bisa cu nan lo asisti pa expresa nan apoyo pa Israel, no Netanyahu.
