(EFE) – Fiscalia a duna orden pa “inicia investigacion corespondiente di forma inmediato” pa denuncia di un posibel spionahe na Corte Constitucional di Colombia. E denuncia ta trata di presunto interceptacion y siguimento ilegal na un di e despacho di e magistradonan.

Asina fiscal general, Luz Adriana Camargo a informa diasabra ultimo despues cu a bira conoci por medio di un investigacion di corant El Tiempo, cu magistradonan a transmiti informacion tocante un presunto spionahe na huesnan, algo cu no ta nada nobo na e pais unda varios caso di spionahe a tuma luga den e sistema hudicial anteriormente.

“Fiscal General a dispone tur recurso na alcance di e entidad pa avansa den actonan investigativo cu lo permiti establece e alcance y impacto di e situacion delicado cu a keda denuncia diaranson ultimo,” Fiscalia a splica den un comunicado.

Segun El Tiempo, den reunion “a papia di presunto siguimento, di spionahe na temanan cu ta bin discutiendo y di presunto interceptacion ilegal” y a pidi Fiscalia di forma oficial pa verifica “si ta berdad cu for di lunanan atras a desplega un labor di inteligencia contra miembronan di Corte.”

Entre e posibel pruebanan tin informacion di presunto tapgesprek na telefon di magistradonan y otro funcionario cu informacion di procesonan sensibel y bao reserva.

Fiscalia a rechasa “cualkier insinuacion di leakmento delibera of indebido cu lo afecta siguridad, proteccion y integridad tanto di e denunciantenan y di nan famia” y a nenga di “divulga e documento firma pa un di e magistradonan di Corte Constitucional.”

E caso di “scucha ilegal” of “chuzada” ta trata di un scandal durante gobierno di Alvaro Uribe (2002-2010) despues cu a bira conoci cu e Departamento Administrativo di Seguridad (DAS) cu no ta existi mas, e cual tabata eherce labornan di inteligencia, a instala microfon na Corte Supremo di Husticia y a intercepta telefonnan di hopi personalidad, entre nan huesnan, periodistanan y opositornan.

Pa e caso aki ta condena, entre otro, Bernardo Moreno, ex-secretario di Presidencia di Colombia y Maria del Pilar Hurtado, ex-hefe di DAS, ken a ser haya responsabel di varios delito pa Sala Penal di Corte Supremo di Husticia.

Na september 2017 ex-director di DA, Jorge Noguera tambe a ricibi un condena di 7 aña, 10 luna y 15 dia di prison, como co-autor di delito di organisacion criminal pa realisa “intercepcion na comunicacion priva, vigilancia y siguimento sin un orden di un autoridad hudicial.”