Ayera tardi durante un conferencia director di Asociacion Trabou di Hubentud na Aruba (ATHA), Franchesca Heinze, a anuncia e proyecto Poder di Hubentud cu e aña aki ta celebrando su di 10 aña. Miembronan di e comision organisatorio di e proyecto a splica cambionan cu a bin e aña aki pa cu e proyecto y kico por spera di e di 10 edicion di Poder di Hubentud.

Henize a splica cu ATHA ta overkoepel organisacionnan relaciona cu mucha y hoben y tin 50 miembro. El a sigui splica cu algun di e miembronan aki tambe lo forma parti di e tayernan cu nan lo ta ofreciendo Poder di Hubentud caminda nan lo ta dunando e hobennan e hermentnan necesario, y e informacion y educacion tocante con nan por hinca un proyecto den otro y activa nan poder den comunidad na Aruba.

E aña aki lo tin algun cambio. Registracion ya a habri, locual kiermen cu organisacionnan, mayornan of cualkier persona por nomina hobennan entre 14 pa 17 aña di edad y persona cu limitacion tambe ta inclui.

E aña aki hobennan tambe por registra pa participa na e proyecto. Por nomina un hoben cu ta destaca y pa e aspecto di proyecto.

Lyonel Dirksz, Coordinador di Poder di Hubentud e aña aki, a expresa su felicidad y entusiasmo pa e di 10 edicion di Poder di Hubentud. El a splica cu durante e 10 añanan di e proyecto nan a bin ta bira hopi di cerca proyecto cuanto hoben a forma parti di dje y tambe e desaroyo cu ta bin durante e proyecto y na final despues di e proyecto tambe.

El a indica cu comision organisatorio ta consisti di hoben- y personanan cu tin experiencia tambe den diferente tereno cu lo bay guia henter e trayecto aki den un par di siman.

Un cambio cu a bin e aña aki ta cu proyecto su duracion ta mas cortico. Dirksz a sigui splica cu den pasado e proyecto aki tabata uno cu tabata dura tres luna mas o menos, pero e biaha aki, y despues di analisa y evalua e diferente edicionnan di e proyecto a yega na e conclusion cu e biaha aki lo ta bon pa haciele durante temporada di vakantie grandi.

E motibo pakico a haci e cambio aki, el a remarca, ta door cu den e temporada di vakantie grandi no tin hopi actividad, no tur hoben tin e privilegio di bay biaha y kizas no tin hopi cos di haci den e temporada di vakantie. Door di esaki e trayecto di Poder di Hubentud lo tuma luga practicamente durante henter e temporada di vakantie grandi pa asina tambe mas hoben cu participa por keda te na final di e proyecto.

Manera ya caba menciona, registracion a habri ayera y nominacion di un hoben ta bay a traves di e pagina di Facebook di ATHA of pagina di Facebook di Poder di Hubentud. Organisacionnan cu ta traha cu hoben tambe por inscribi un hoben cu ta cay den e categoria pa por wordo nomina.

Na final e comision di Poder di Hubentud ta bay selecta e hobennan cu lo por forma parti di e anochi di nominacion y despues lo continua tambe cu e trayecto di seis siman caminda na ATHA y diferente localidad e hobennan lo ricibi diferente seminario y guia for di varios instancia pa nan desaroyo personal y intelectual, cu alabes lo yuda y siña nan con nan por yega na un proyecto, con nan por traha un proyecto y con nan por ehecuta un proyecto.

Durante e anochi final e hobennan ta presenta nan proyecto dilanti un cuerpo di hurado cu lo scoge cual proyecto ta bira e proyecto ganador. Pa e ganador ta bay tin un premio cash y e premio aki ta pa yuda e hoben ehecuta su proyecto.

Ademas di esaki un di e nominadonan di e trayecto di Poder di Hubentud tambe lo wordo scogi como ganador y lo ricibi un premio cash. E premio aki lo yuda e hoben cumpra cierto material pa nan desaroyo personal.

Dirksz a menciona cu e aña aki ta bay tin diferente actividad plania, banda di e trayecto, entre otro un Youth Fair cu e hobennan di Poder di Hubentud ta bay organisa.

John Freddy Montoya di Departamento di Cultura Aruba (DCA) ta e Creative and Art Executive di Poder di Hubentud.

Montoya a subraya cu e proyecto aki ta uno valioso pa loke ta trata hubentud. El a indica cu e parti di e proyecto cu ta resalta ta cu e ta brinda oportunidad na e hobennan cu ta destaca realmente den comunidad den diferente area.

Tin diferente area den cual por nomina un hoben pa participa den Pdoer di Hubentud, entre otro cultura, arte, deporte, ciencia y tecnologia.

“Poder di Hubentud, manera cada dia ta un dia nobo, cada edicion ta un edicion nobo. Tin un perspectiva na unda e protagonista central ta keda e hoben. Nos ta brinda e oportunidad den un trayecto unda nos ta ekipa nan cu e hermentnan necesario pa e hoben por sigui desaroya personalmente y profesionalmente,” el a remarca.

Manera ta conoci Poder di Hubentud cada aña tin un tema, un reto specifico y e aña aki, Montoya a anuncia, e tema ta “Bib’e”. E tema aki ta enfoca riba con e hoben por biba un experiencia inolvidabel na unda tur talento, cu kisas ta scondi, por ser descubri pa pone tur nan podernan den practica na beneficio di comunidad.

“Nos hobennan nos ta pone nan den un plataforma unda nan ta sigui briya. Nos ta brinda e instrumentnan aki pa asina ki nos tin futuro profesionalnan digno pa aki un par di aña nos ta spera cu e hobennan ta sigui draai e comunidad aki den un direccion positivo. Nos ta resalta di cada hoben su poder,” Montoya a enfatisa.

Ya caba por nomina hoben pa Poder di Hubentud y hobennan interesa den e parti di proyecto por registra tambe. Deadline pa registracion ta 27 di juni 2024.