Pa varios luna caba ciudadanonan di Aruba ta experienciando interupcionnan di coriente repetidamente. Solamente den e transcurso di e siman aki tabatin varios interupcion di coriente pa diferente motibo.

Ayera e bario di Montaña y bisindario a keda sin coriente. ELMAR NV a informa cu debi na un accidente envolviendo un palo di coriente tabatin un problema den e distribucion di coriente den e area aki. Tecniconan di ELMAR a yega na e sitio pa haci e reparacionnan necesario y restaura e suministro di coriente.

E dia anterior, diahuebs, varios bario y districto rond di Aruba a keda sin coriente durante algun punto di e dia. Na tres ocasion na diferente districto coriente a bay. E prome interupcion a sucede den e area di Lagoville y vecindario. ELMAR a informa cu e causa di e interupcion tabata debi na un fayo riba un kabel subteraneo.

Nan a indica cu e interupcion tabata riba un kabel bou di tera, cual ta rekeri midimento di e kabel pa identifica e fayo.

E di dos ocasion cu coriente a bay tabata den e area di Santa Cruz y Macuarima. Den e caso aki, un biaha mas, e interupcion tabata debi na cu un truck a ranca liñanan di distribucion di coriente y kibra un palo di coriente.

ELMAR a informa cu reparacionnan tabata tumando luga riba shete palo di coriente y cu e trabounan di reparacion lo tin un duracion di mas o menos 4 pa 5 ora.

Nan a indica cu bebi na hopi daño material, nan mester a sigura cu e area ta limpi di tur obheto causa pa e accidente pa por a eherce e trabou di reparacion. E a inclui un analisis di e situacion y crea un lista di material necesario, e instalacion di un palo nobo di coriente y tur e componentenan di coriente, y zwaai e liñanan di distribucion.

E di tres interupcion di coriente a sucede den e area di Savaneta, Rooi Kochi y bisindario/ E causa di e interupcion aki tabata debi na un fayo riba un kabel subteraneo, un biaha mas.

Ciudadanonan ta hopi disgusta y malcontento pa tur e situacionnan aki y mayoria ta haciendo reclamonan ya cu e interupcionnan di coriente asina sigui ta trece riesgo grandi cu aparatonan electronico por daña.

Manera ta conoci caba expertonan di Washington a bin Aruba pa haci un investigacion den loke ta e problemanan aki y e red di coriente ELMAR NV. E resultado di e investigacion aki ta indica cu e situacion ta grave y mester cuminsa traha riba e solucion pronto, pero lamentablemente, pa motibo di diferente factor, ta bay tin retraso y pues ciudadanonan lo sigui experiencia e interupcionnan di coriente pa un tempo mas.