(DW) – Awaseronan causa pa tormenta tropical Alberto na Monterrey, nort di Mexico, te diahuebs ultimo a laga cuatro persona fayecido, inundacionnan, careteranan cera, poblacionnan sin comunicacion, riunan desborda, asina como un cantidad importante di awa den damnan.

E yobidanan tambe a provoca un actividad intenso di corporacionnan di rescate, Proteccion Civil y Ehercito Mexicano, asina como di Guardia Nacional, cu a implementa e plan denomina ‘Plan DN-III-E” pa emergencianan di desasternan natural.

E prome victimanan mortal ta tres mucha menor di edad, cu a perde nan bida na municipionan di Monterrey y Allende.

E prome caso, un menor di 15 aña a cay den awanan di e riu La Silla, na ciudad di Monterrey, esun cu mas poblacion na nort di e pais, ora el a bay busca un bala cu e cual tabata hunga futbol.

Na Allende, na sur di Nuevo Leon, dos menor cu tabata biaha den un bais a electrocuta ora a toca un palo di luz.

E di cuater victima ta un homber di municipio di El Carmen, ken tambe a fayece electrocuta mientras tabata realisa un reparacion electrico na su cas memey di awaseronan intenso.

Na municipio Linares, na sur di Nuevo Leon, e riu Pablillo a desborda lagando varios hogar inunda pa loke su habitantenan mester a ser evacua.

Gobernador di Nuevo Leon, Samuel Garcia, a anuncia e apertura di e sluizen di e dam La Boca pa asina baha su cantidad di awa. Tambe a anuncia medidanan preventivo entre e poblacion pa evita tragedianan.

Na localidad di Hualahuises, autoridadnan a confirma evacuacion di 18 famia debi na aumento di e riu Hualahuises. Mientras cu na Aramberri e riu Blanco a inunda varios cas cu ta rond di e palacio di Gobierno Local.

Autopista El Satillo-Monterrey, cu ta uni estado di Nuevo Leon cu Cohauila, a ser cera for di oranan di marduga di diahuebs debi na condicionnan cu tabata presenta y presencia di teranan cu a los.

Oranan despues, Alberto e prome tormenta cu nomber den temporada di horcannan na Atlantico a debilita su forsa di horcan y a bira tormenta tropical segun autoridadnan y meteorologonan ken a reporta e mesun diahuebs.

Sinembargo, Servicio Meteorologico Nacional di Merca a adverti cu e restonan di e tormenta ta keda produci “fuerte awaseronan riba nortwest di Mexico, cu probabel inundacionnan y teranan cu lo por los cu por pone den peliger e bidanan.”