Ayera den Parlamento di Aruba a tuma luga e reunion publico tocante e proyecto di iniciativa di ordenansa nacional cu ta modifica e Codigo Civil di Aruba pa haci varios cambio relaciona cu optimisacion di e trabounan di huurcommissie.

Minister Wever a splica cu motibo pakico a prepara e cambio di ley ta pasobra huurcommissie pa ta un parti importante di e servicionan cu gobeirno ta brinda na e ciudadanonan. “Hopi hende ta haci uso di e acceso na huurcommissie y tin e necesidad pa huurcommissie ta un instituto mas moderno cu ta funciona na un forma mas agil y mas eficiente y na un forma mas transparente,” el a bisa.

E cambio di ley aki, el a indica, ta duna e espacio cu ta percura pa tin un miho forma con nan ta selecciona e profesionalnan, e expertonan, hendenan independiente, cu ta forma parti di huurcommissie.

Pa e motibo ey gobierno a incorpora den e ley cu mester bin rekisitonan di expertonan y un profielschets. Minister Wever a menciona cu manera Raad van Advies a bisa, ta asumi cu esey ta algo cu ta obvio, pero toch hopi biaha esey no ta e caso.

“Den e caso aki nos kier a hankre den e ley pa asina tur minister cu bin despues tambe mester cumpli cu e parti ey, percura cu tin un profielschets, proceduranan y cu tin hendenan cualifica cu por haci e trabou aki,” el a señala.

El a sigui splica cu huurcomissie defacto ta funciona como un tipo di tribunal, un tipo di instancia huridico den prome instancia, na unda ciudadanonan por yega ora cu nan tin un disputa di prijs di huur di propiedad, den cual huurcomissie por yuda y calcula kico e prijs di huur maximo ta.

E mandatario a sigui splica cu tambe ora cu un persona kier termina e contract di huur, nan mester un permiso di huurcommissie. El a subraya cu pa e motibonan aki ta importante pa den huurcommissie tin hendenan cu tin conocemento di e leynan di huur di propiedad en general.

El a agrega cu tambe mester tin personanan cu tin experticio den e ramo di leynan di construccion, hendenan cu ta conoce e structuranan y cu por duna un opinion tocante kico mester mester bira e prijs adecua di huur pa un propiedad.

Na mesun momento el a subraya cu ta importante pa e miembronan wordo nombra pa un periodo defini y no pa un periodo indefini. Esaki, el a señala, ta pa garantisa no solamente continuidad, pero tambe cu tin innovacion den e sentido cu cada biaha tin hednenan nobo ta bin traha den e huurcommissie y no cu tin un organisacion unda pa añas e mesun personanan ta forma e huurcommissie y no tin hendenan nobo ta bin.

Minister Wever a splica cu pa e motibo ey a pensa cu un periodo di cuater aña pa e personanan por forma parti di e huurcommissie ta un periodo apropia, cu un posibilidad pa extende e periodo un biaha cu cuater aña mas.

E mandatario a menciona cu Raad van Advies a recomenda pa kizas laga e secretaria di huurcommissie ta un expcecion pa esaki y laga e secretaria keda pa un tempo indefini, pero, el a subraya, gobierno ta prefera pa e secretaria wordo inclui den cambio y tambe tin un periodo defini tambe. Esaki, el a resalta, ta pa evita cu e mesun persona ta haci e mesun trabou pa 20 aña y di e forma ey tambe no lo tin hopi cambio den e manera con ta anda cu cambionan den sociedad.

Minister Wever a sigui splica cu den e cambio di ley aki a incorpora tambe un disposicion caminda cu por bin cu mas regla pa e funcionamento di huurcommissie. Anteriormente e minister cu ta encraga cu huurcommissie y ta responsable politicamente, cu den e caso aki ta minister di Asuntonan Economico, no tabatin e hermentnan legal pa por ehemplo determina con e huurcommissie ta funciona. E minister ta responsable politicamente, pero no por instrui, no por pone regla riba con nan ta funciona, cuanto biaha pa siman nan ta reuni of con nan ta reuni.

Pues no ta un reglamento di proceso, kiermen esnan cu ta bay huurcommissie no tin e mesun garantia ainda manera cu tin den otro organonan. “Nos ta pensa ta importante toch pa esaki wordo regla na un forma mas corecto y pesey su base mester ta den e ley,” el a remarca.

E mandatario a indica cu nan ta regla esaki a traves di LBHAM cu ta duna un poco mas flexibilidad y ta establece tambe cu huurcommissie mester reporta na e minister y e ora minister por reporta back na Parlamento di Aruba cuanto caso nan atende, kico ta terminonan, kico ta parti financiero, kico ta e retonan cu e huurcommissie tin, entre otro.

“Ora mi a bira minister mi a encontra e huurcomissie y mi a purba di haya un grip ariba e funcionamento, pero toch esaki, mirando cu no tabatin e instrumentonan legal, tabata mas dificil, pero na mesun momento bo ta responsable pe politicamente. Mi ta kere e ora ta na su luga pa nos tin un framework un poco mas legal cu ta guia e minister con e tin cu maneha su huurcommissie conforme cu su responsabilidadnan,” e mandatario a resalta.

Inicialmente e cambio den ley aki mester a drenta na vigor dia 1 di april di e aña aki, perro pa difernete motibo esaki no por a tuma luga. Minister Wever a entrega un nota di cambio e ora pa cambia e fecha cu ley ta drenta na vigro pa dia 1 di augustus 2024.

Na final di e reunion e ley a wordo aproba unanimamente y ta spera cu e cambionan den e ley drenta na vigor riba e fecha nobo cu a wordo stipula.