Ayera, Dienst Openbare Werken Aruba (DOW) a informa cu nan a haya un melding tocante e handrails di Hooiberg, cu aparentemente a ser vandalisa y mester a kita nan, pa loke ta pidi na bishitante y turista pa tene cuenta cu esaki.
Den un post, e departamento a publica cierto potret cu ta ilustra e estado den cual e handrails tabata, na unda algun di nan a bolbe los, segun a sigura.
“Siman a habri unda cu a haya notificacion cu e handrails na Hooiberg a bolbe los. Nos personalnan a bay na e sitio y a constata cu ta vandalismo a wordo haci. A dicidi di kita tur e handrails pa asina evita algo pasa. Ta pidi e bishitantenan/turistanan pa tene cuenta cu no tin handrails na e momentonan aki y tene cuenta ora di subi y baha Hooiberg. Por ultimo nos kier a danki na departamento di Bouwkundige Werken pa actua lihe di kita e handrails aki.”
Tabata na aña 2022 cu minister di Turismo Dangui Oduber a anuncia e proyecto di renobacion di e trapi di sero Hooiberg, unda a modernisa y drech’e completamente hunto cu e gazebo. Gobierno a duna di conoce un inversion di 650 mil florin pa inversion di cierto luganan na Aruba pa aña 2023, incluyendo e proyecto aki. E handsrails a ser poni pa garantisa seguridad adicional pa e bishitantenan di e luga.
E meta di esaki, segun e mesun minister a sigura den un conferencia di prensa na pia di Hooiberg, tabata pa “hunto cu ATA lo construi un mirador nobo na e top di Hooiberg y tambe hunto cu TPEF, lo drecha e trapinan di Hooiberg por medio di mosaik. E meta ta pa Hooiberg bira un atraccion colorido pa localnan y turistanan.”
Sinembargo, mas cu un aña despues cu e handsrails aki a ser poni, ya caba mester a cambia nan debi na loke segun nan ta sigura ta vandalismo.
Por a constata cu e melding cu DOW a ricibi a ser haci a traves di un post di un usuario di rednan social e cual a bay viral y a haya basta reaccion di comunidad cu a cuestiona e gasto cu a ser haci, e tempo cu a tuma pa haci e trabou y tambe a cuestiona e compania cu a realisa e proyecto di renobacion aki e cual no a dura ni dos aña.
