(AP) – Ilya Sutskever, un di e fundadornan di OpenAI cu tabata involucra den un esfuerso fracasa di saca CEO Sam Altman, a bisa cu e lo cuminsa un compania enfoca riba inteligencia artificial specificamente pa seguridad.
Sutskever, un investigador di AI respeta cu a sali for di e compania creador di ChatGPT luna pasa, a bisa den un publicacion riba rednan social diaranson cu el a crea Safe Superintelligence Inc. cu dos co-fundador. E compania su unico meta y enfoke actualmente ta di desaroya di manera safe “superinteligencia”, un referencia na un sistema di AI cu ta mas sabi cu ser humano.
E compania a compromete di no ser distrai pa “maneho of ciclo di producto,” y bao su modelo di negoshi, trabao riba seguridad lo ta “insula for di presionnan comercial,” Sutskever y su co-fundadornan Daniel Gross y Daniel Levy a bisa den un declaracion prepara.
E 3 a bisa cu Safe Superintelligene ta un compania Mericano cu rais na Palo Alto, California y Tel Aviv, “unda nos tin rais fuerte y e habilidad di recluta talento tecnico top.”
Sutskever tabata parti di un grupo cu a haci un intento, cual a fracasa, aña pasa di saca Altman. E incidente den e directiva, cual Sutskever despues a bisa cu e ta repenti di dje, tambe a causa un periodo di conflicto interno centra riba si e lidernan na OpenAI ta dunando prioridad na oportunidadnan di negoshi mas cu seguridad di AI.
Na OpenAI, Sutskever a lidera un ekipo cu tabata enfoca riba desaroya un AI cu ta miho cu ser humano como parti di artificial general intelligence of AGI. Ora cu el a sali for di OpenAI, el a bisa cu e tabatin plan pa un proyecto “cu hopi nificado personal” pero no a duna ningun detaye.
Sutskever a bisa cu e tabata su decision pa sali for di OpenAI.
Dianan despues di su salida, co-lider di su ekipo Jan Leike tambe a retira y a expresa critica na OpenAI pa laga seguridad “keda atras den bista di productonan briyoso.” OpenAI despues a anuncia e formacion di e comite di seguridad, sinembargo el a ser yena primeramente cu personanan di dentro di e compania.
