(NLTimes) – E sosten pa coronavirus cu e gobierno Hulandes a duna negoshinan tabata hopi efectivo. E economia Hulandes lo a ricibi hopi mas daño sin dje. Sinembargo, el a dura hopi tempo segun CPB a conclui den un estudio tocante efectonan di e sosten di coronavirus.
Casi inmediatamente cu e prome lockdown di coronavirus, e gabinete Rutte III a crea un pakete di sosten di 30 biyon euro. E negociantenan por a usa e sosten aki pa paga nan empleadonan y cubri gastonan standard. Nan por a reporta esaki den impuesto y hendenan cu ta emplea nan mes por a bay municipalidad pa ricibi sosten.
Segun CPB, esaki tabata hopi efectivo. E economia Hulandes a cay cu 8 porciento den e prome kwartaal di coronavirus, sinembargo e dolor a ser carga pa gobierno mas tanto. Falta di empleo a permanece abao y Hulanda a sigui funciona, cu bon resultado compara cu otro paisnan Europeo.
“E pakete aki tabata un cusinchi pa e economia. Tabatin miedo di un paro completo, sinembargo esaki a crea e confiansa cu e economia por recupera, hasta den un pandemia,” CPB su investigador Bastiaan Overvaast a bisa.
E parti malo di esaki ta cu e gabinete a mantene e sosten pa hopi tempo, eventualmente dunando companianan alrededor di 86 biyon euro den sosten. Segun CPB, e gobierno mester a retira e paketenan den fase y mas trempan. Pa motibo cu e sosten a keda core demasiado tempo, e economia a opera demasiado bon pa un tempo. “E mercado di labor a keda preta y e economia a sigui crece. Sinembargo e sosten a continua. E por a ser retira mas trempan.”
